Política Lingüística pide a integración do galego na plataforma tecnolóxica europea OLS
xoves, 16 de febreiro do 2023
O
secretario
xeral de Política Lingüística, Valentín García, participou este
16 de febreiro na sesión do Intergrupo de Minorías Nacionais e
Linguas do Parlamento Europeo para tratar a inclusión do galego,
o catalán e o éuscaro na plataforma Online Language Support
(OLS) do programa Erasmus +. A reunión celebrouse en Estrasburgo. No
seu transcurso, García dixo que o estudo do galego “abre unha
porta de entrada perfecta ao mundo da lusofonía, que engloba 250
millóns de habitantes”.
A
aplicación OLS é unha gratuíta e en liña que ten como finalidade
facilitar aos estudantes que se acollen ao programa de mobilidade
europea Erasmus e aos participantes do programa europeo de
solidariedade (European Solidarity Corps) a aprendizaxe das
linguas oficiais da Unión Europea, así como do islandés,
macedonio, noruegués, serbio e turco.
O
representante da Xunta sinalou que as tres universidades públicas
galegas “reciben cada curso algo máis de 1000 alumnos e alumnas
para realizar os seus estudos como participantes do programa Erasmus
+”.
Neste marco, Valentín García fixo fincapé en que o slogan a través
do que se promove Erasmus+ 2021-2027 afirma que este programa “é
máis inclusivo, máis dixital e máis ecolóxico”. E engadiu:
“Cómpre que a lingua galega, o código de comunicación dun millón
e medio de falantes na actualidade, estea presente na Online
Language Support para que as persoas que cursan os seus
estudos en Galicia poidan integrarse na nosa sociedade en xeral e na
comunidade universitaria en particular”, sinalou.
Ademais,
aproveitou para lembrar que a lingua galega, “que formou parte dun
tronco lingüístico común co portugués ata o século XV, é aínda
a día de hoxe unha porta de entrada perfecta no amplo mundo da
chamada lusofonía, que engloba un total de 250 millóns da falantes
en catro continentes”. Deste xeito, “dándolles a posibilidade de
aprender o galego, estáselles entregando tamén unha chave para
abrir esa porta”, dixo.
A
solicitude de inclusión das tres linguas cooficiais na OLS foi
impulsada pola Xarxa Vives d´Universitats, que engloba 22
universidades de Cataluña, Comunidade Valenciana, Illas Baleares e
Andorra. Co tempo, foi sumando o apoio de numerosas universidades e
gobernos autonómicos do resto do país, incluíndo recentemente a do
Ministerio de Universidades do Goberno de España. A decisión final
será tomada pola Unión Europea tras un período de reflexión.