Pont-Up Store abre as súas portas estreando unha versión virtual e permanente da feira
venres, 24 de setembro do 2021
A
feira de emprendemento Pont-Up
Store abriu as súas portas, reais e virtuais, este 24 de
setembro en Pontevedra, coa praza de España como eixe de actividades
(onde os responsábeis do proxectos de mercado participantes mostran
ao detalle as súas propostas). Segundo a organización, este ano
constatouse un importante incremento das contribucións lideradas por
mulleres, sustentábeis e coa vista posta no rural. De feito, dos 40
emprendementos que participan, un 55% están liderados por mulleres,
e que teñen no corazón da súa filosofía empresarial a
sustentabilidade.
Esta
edición acolle ademais un dos grandes acontecementos da historia da
Pont Up Store: a posta en marcha do espazo dixital_pontup, un
espazo virtual que permitirá manter a actividade da comunidade
emprendedora galega durante todo o ano, con experiencias inmersivas
que van desde visitas virtuais a empresas con compra incluída, ata a
organización de eventos en liña relacionados co mundo do
emprendemento.
No
acto de apertura participaron Miguel Anxo Fernández Lores, alcalde
do Concello de Pontevedra; Jorge Soto Carballo, vicerreitor do Campus
de Pontevedra da Universidade de Vigo; Manuel González Martínez,
deputado provincial na Deputación de Pontevedra; María del Carmen
Fernández Pena, directora Territorial de Pontevedra de Abanca; e o
director do encontro, Pedro Figueroa. Tamén asistiron ao acto, Tino
Fernández, tenente de alcalde do Concello de Pontevedra; Ernesto
Pedrosa Silva, presidente do Consello Social da Universidade de Vigo;
Teté Vilar Moral, responsábel de emprendemento da CZFV; Pablo Louro
Carballeira, delegado Gadisa na Provincia de Pontevedra; Jose María
Corujo Seguido, presidente de AEMPE; e Jesús Rey Rodríguez,
presidente de AJE Pontevedra.
Pedro
Figueroa destacou “o paso histórico que se dá nesta edición ao
poñer en marcha unha plataforma de posibilidades infinitas que nos
vai permitir adaptarnos mellor a situacións como a acontecida na
pandemia e que ademais vai facilitar e acelerar con moito o medre das
empresas que forman parte da nosa comunidade, que a partires de agora
van ter á súa disposición un escaparate permanente os 365 días do
ano, un lugar de encontro e intercambio de experiencias para
aproveitar durante 12 meses as mesmas sinerxías que vemos cada
edición no encontro presencia, desde reunións e eventos ata visitas
a cada negocio coa posibilidade incluso de realizar compras”.
Trátase da aplicación dixital_pontup, desenvolvida por
Xeométrica (empresa participante na segunda edición do Pont-Up
Store e que na actualidade pertence ao Grupo Coterena), que foi
posíbel grazas á achega de 6.000 euros por parte da Concellaría de
Promoción Económica de Pontevedra.
Segundo
fixo saber Figueroa, a plataforma dixital_pontup permitirá
que as empresas que fan parte da comunidade emprendedora do Pont-Up
Store poidan ser visitadas non só desde calquera lugar, senón tamén
en calquera momento, “outorgando ademais unha meirande proxección
ás mesmas e un maior valor engadido aos seus patrocinadores”.
Amais, engadiu o director da feira de emprendemento pontevedresa, a
nova ferramenta dixital permitirá, entre outras cuestións, contar
cunha programación propia durante todo o ano para a realización de
foros, xuntanzas, intercambios de experiencias ou actividades
sectoriais dedicadas ao novo emprendemento; e máis a integración no
aplicativo dunha zona de exposicións destinada a navegar por stands
virtuais e interactivos que conterán os proxectos de emprendemento
seleccionados na edición e que mostrará unha recreación dixital e
interactiva da súa tenda. Tamén posibilitará contactar en tempo
real por medio de videochamadas ou efectuar compra.
Máis
mulleres
O
director do Pont-Up Store tamén destacou que esta edición do
Pont-Up estará “claramente liderada polo emprendemento feminino,
que supón un 55% das empresas que van dar a coñecer as súas
iniciativas”, e tamén é “decididamente sustentábel con case un
100% das iniciativas aplicando criterios de respecto ao medio
ambiente de forma transversal ou como sinal de identidade”.
Ademais, dixo, “constátase o crecemento do emprendemento radicado
en vilas e aldeas que supón xa un 40%, fronte o 60% que se asenta
nas cidades, e, entre estas últimas, Vigo é o polo emprendedor por
excelencia dentro da provincia de Pontevedra que protagoniza o 50%
das iniciativas”.
Un
fervedoiro de emprendementos
En
total van participar nesta edición 40 startups galegas; 35
serán empresas cun emprazamento de seu, e outras 5 empresas
desenvolverán actividades demostrativas na carpa. Entre elas hai un
grupo de 12 empresas con negocio de nova implantación neste contexto
actual de pandemia e unha que recunca no encontro grazas ás
innovacións aplicadas na xestión e produción da empresa. Entre as
empresas seleccionadas ao abeiro desta convocatoria salientan (entre
outras) as propostas tecnolóxicas Evourbe, que vai presentar un
sistema intelixente de xestión de estacionamento que nace co
obxectivo de revolucionar o estacionamento nas cidades, ou Vi&Go,
que lanza un proxecto de mobilidade sustentábel mediante subscrición
de motos eléctricas e intelixentes e un sistema de carga de
baterías.
Tamén
estarán presentes iniciativas tan sobranceiras como Benestar Market,
un espazo online onde comprar produtos naturais, sustentábeis
e zero waste; SmartWood,
unha ferramenta orientada á mellora da produtividade e o rendemento
das explotacións agrícolas e forestais; Weet Energy & Telecom,
unha contribución innovadora para crear novos xeitos de
abastecemento eléctrico; ou I+ADN, consultora de innovación.