Ponteareas retransmite os seus plenos en directo a través de Facebook Live
venres, 24 de marzo do 2017
- O concelleiro de Ponteareas, Benito Márquez
Ponteareas
comezou o ano apostando de cheo polas redes sociais e as novas
tecnoloxías en xeral. Por unha banda, puxo
en marcha o proceso para subirse ao carro da Administración
Electrónica. Pola outra, anunciou
en xaneiro a súa vontade de retransmitir os plenos en directo a
través dos servizos de comunidades dixitais, máis polo miúdo a
través de plataformas como YouTube e Periscope. Agora, o
Concello
de Ponteareas
volve ampliar a súa arela de traballar e comunicarse dixitalmente
apostando por retransmitir, tamén, os plenos en directo a través de
Facebook Live. Para isto tirarase proveito da infraestrutura xa
habilitada previamente (cámaras de alta definición robotizadas para o
seguimento
dos intervenientes, optimizacións
importantes no
sistema de intervención e audio).
Segundo
informan fontes do Concello, a retransmisión en Facebook Live
estreouse na sesión de goberno deste 21 de marzo.
Para
Benito Márquez, concelleiro de Novas Tecnoloxías, non hai dúbida
sobre a importancia deste novo fito a prol da transparencia e a
participación. “Facebook”,
sinala,
“é unha das redes sociais máis utilizadas pola cidadanía e, por
tanto, consideramos conveniente que os plenos se retransmitan
directamente a través desta plataforma”. Na
súa opinión, “a
política debe abrirse á cidadanía e esta é unha boa maneira de
que a veciñanza poida ver aos seus representantes políticos e as
súas explicacións”.
O
edil de Novas Tecnoloxías sinalou tamén que “o Concello debe ir
parello á sociedade e modernizarse, e deixar de ser unha
Administración
arcaica non adaptada aos tempos”. E
engade: “Cada
día máis xente accede decote
ao
Facebook, e consideramos preciso, por tanto, que o Concello estea
presente nesta plataforma e que aquel que o desexe poida ver o pleno
en directo, aínda que non poida acudir ao
consistorio por
estar enfermo ou por estudar fóra, por exemplo”.