Pontevedra achéganos catro playlists para coñecer a historia das mulleres de cidade

O Concello de Pontevedra, a través da Concellaría de Memoria Histórica, ampliou co inicio do novo ano os horizontes tecnolóxicos do programa A Memoria das Mulleres, co obxectivo de “seguir afondando na visibilización do pasado e o presente feminino”. Fíxoo actualizando e completando, na web dogrisaovioleta.gal, a información de catro roteiros urbanos en formado playlist centrados na historia das mulleres de Pontevedra. Estes paseos veñen de ser postos a punto con novos mapas e versión de texto e audio, facilitando así o acceso a todo tipo de públicos. Ademais, estes audios tamén se atopan dispoñiíbeis en versión podcast a través das plataformas iVoox e Soundcloud.
O concelleiro Xaquín Moreda explicou que se trata dun xeito alternativo e enriquecedor de “coñecer a cidade ao tempo que se camiña por ela”. Tamén indicou que “se ben os roteiros contan con información escrita, e tamén existe un mapa físico que axuda a saber onde están os principais puntos de interese en relación co programa da Memoria das Mulleres, tamén é posíbel facer uso destes audios para vivir outra experiencia máis cómoda ou particular, ao tempo que aumenta a accesibilidade”.
Os catro roteiros son os seguintes:
- Roteiro sobre as mulleres represaliadas de Pontevedra (deseñado por Montse Fajardo)
- Roteiro Mulleres en San Amaro. Percorrido feminino polo Cemiterio Municipal(deseñado por Etnoga)
- Roteiro Pontevedra en feminino (deseñado por María Xesús López Escudeiro)
- Roteiro da Moureira. O río, o mar e as mulleres (deseñado por Etnoga)
Desde a concellería de Memoria histórica lembran que este formato audio tamén pode “resultar útil” para ser engadido ou utilizado nos centros educativos da cidade, como ferramenta de divulgación entre a rapazada para unha dinamización das clases, entrando dentro das progamacións didácticas. É posíbel consultar toda a información completa de cada roteiro na devandita web dogrisaovioleta.gal..
Nado no ano 2013, da man do Concello de Pontevedra, o proxecto A Memoria das Mulleres ten como finalidade “construír, de modo colectivo e cooperativo, un fondo documental, gráfico e audiovisual da historia das mulleres en Pontevedra”.