Pontevedra e Lugo no top de destinos máis buscados de España no portal Booking

xoves, 23 de novembro do 2023 S. P.

O traballo en materia turismo e tecnoloxías dos nosos Concellos está a dar importantes resultados na Rede. Isto é aplicábel a Pontevedra e a Lugo, que veñen de obter un importante recoñecemento no portal Booking, o buscador de aloxamentos turísticos, onde Pontevedra resultou ser a cidade do eido estatal con maior número de buscas por enriba de Madrid e Barcelona, e onde Lugo acadou un máis que meritorio sexto lugar.
As reaccións non se fixeron agardar. O alcalde de Pontevedra, Miguel Anxo Fernández Lores, amosou a súa satisfacción polo interese xerado pola cidade no dito portal turístico: “Isto quere dicir que Pontevedra está de moda, que Pontevedra é atractiva, pero é atractiva por moitísimas cousas, sobre todo pola xente, pola súa capacidade de acollemento, pola súa comodidade, polo seu respecto ao medio ambiente, pola gastronomía, e porque está, ademais, nun espacio que son as Rías Baixas que eu sempre dixen que era o Caribe de Galicia”.
Pola súa banda, a concelleira de Cultura e Turismo de Lugo, Maite Ferreiro, afirmou que “ano a ano vemos como a acción da área de Turismo continúa a mellorar os datos de visitantes”, e salientou o sexto posto obtido en Booking na listaxe de destinos máis buscados do 2024. Para a edil, “isto demostra que Lugo está xa no mapa dos destinos turísticos de calidade, tócanos seguir traballando para consolidar este posto e seguir mellorando para ser un referente a nivel estatal e internacional”.
Sinalar a maiores que Vigo foi quen de acadar o número 13 da dita clasificación, seguida a pouca distancia de Ourense, no posto 19 da posición.

PUBLICIDADE