Pontevedra explica a súa historia ás novas xeracións con oito vídeos subidos ao YouTube
luns, 8 de agosto do 2022
O Concello
de Pontevedra, a través da área de Patrimonio Histórico que dirixe
Xaquín Moreda, presentou unha nova e innovadora proposta para dar a
coñecer a cidade e o seu devir nos séculos. Seguindo o ronsel
de experiencias previas destinadas a conectar co gran público e
especialmente coas novas xeracións (experiencias como o videoxogo
Ponte Veteri, que propoñía un roteiro circular
polo casco histórico da cidade centrado nas confrarías e na
concesión do Foro a Pontevedra; ou a unidade didáctica para os
Concellos que fai un repaso nas aulas do pasado da cidade a través
da arquitectura e da trama urbana), vénse de dar forma a un novo
formato audiovisual de oito pezas de curta duración que, subidas ao
Youtube, explican a historia da cidade e sirven de complemento á
dita unidade didáctica. Foron feitas por Taller Abierto a través do
traballo xerado nas iniciativas previas devanditas.
Son unha serie de vídeos cunha duración
aproximada de dous minutos, locutados, e que recollen diferentes
épocas ou poñen a súa atención en períodos concretos.
As pezas poden xa ser descargas ou vistas desde
YouTube, na
canle oficial do Concello de Pontevedra, se ben, seguindo as
palabras de Moreda, a idea
é crear unha páxina de seu onde estarán dispoñíbeis na ligazón
ponte.gal/historiadaformaurbana.
Nesta páxina tamén estará pendurada a unidade didáctica, como un
recurso base, para que o profesorado da cidade poida levar a historia
e o urbanismo local até as aulas “dun xeito amábel e didáctico”.