PremiumFiber será a empresa de fibra óptica froito da colaboración entre MasOrange e Vodafone

MasOrange, Vodafone España e o fondo soberano de Singapur GIC presentan PremiumFiber, a nova marca coa que operará a maior compañía de fibra óptica do Estado, froito do acordo alcanzado entre as tres entidades o pasado mes de agosto. A empresa aspira a converterse no socio tecnolóxico de referencia para todos os clientes, ofrecendo un servizo de calidade superior.
PremiumFiber estará participada por MasOrange cun 58 %, Vodafone España cun 17 % e GIC cun 25 %. As dúas operadoras achegarán conxuntamente arredor de doce millóns de unidades inmobiliarias e preto de cinco millóns de clientes á nova sociedade, que dedicará a súa rede en exclusiva a ambos operadores, mantendo cada un as infraestruturas achegadas. A operación está pendente das autorizacións regulatorias correspondentes e prevese que o seu peche se produza no último trimestre do ano.
A dirección de PremiumFiber estará encabezada por Blanca Ceña como conselleira delegada. Enxeñeira de Telecomunicacións pola Universidade Politécnica de Madrid, Ceña conta cun MBA da EOI e estudos de posgrao en ESADE. Ao longo de máis de tres décadas no sector das telecomunicacións, desempeñou cargos de máxima responsabilidade, entre eles o de presidenta e CEO de Vantage Towers e directiva en Vodafone España.
Xunto a ela, o equipo directivo estará formado por profesionais de ampla traxectoria: Juan Luis Delgado, director xeral legal e secretario do Consello (anteriormente en MasOrange e Grupo MásMóvil); Rafael Casquel, director financeiro (procedente de Totem Spain e Orange España); e Norberto Ojinaga, director xeral de tecnoloxía (con experiencia en MasOrange, Grupo MásMóvil e Euskaltel).
A rede de PremiumFiber achegará vantaxes substanciais aos clientes de MasOrange e Vodafone, ofrecendo un servizo de carácter VIP cunha infraestrutura deseñada para o futuro. Permitirá unha conectividade de alta fiabilidade e estabilidade, velocidades máximas en fogares e empresas, baixa latencia para unha mellor experiencia dixital (especialmente no ámbito do gaming) e os máis altos estándares de seguridade grazas á integración das tecnoloxías máis avanzadas.
A compañía contribuirá ademais á modernización e dixitalización do país, dotando a ambos operadores dunha rede FTTH de referencia, mellorando a eficiencia operativa e sentando as bases para a continua evolución das redes e dos servizos. A súa maior escala, a presenza de dous clientes sólidos e a capacidade de investimento facilitarán a adopción rápida de tecnoloxías de vangarda como o estándar XGS-PON.