Preparan un novo modelo de Motorola Razr

A finais de 2019 a presentación do novo Motorola Razr con pantalla encartable conseguiu grande repercusión mediática, para chegar poucos meses despois ao noso mercado a un prezo de 1.599 euros, o que provocou que o público ignorase completamente un produto cun prezo disparatado (xa que as prestacións técnicas do terminal correspondían a un móbil de gama media), pero o grande éxito de vendas que está a ter actualmente o Samsung Galaxy Z Flip3 5G podería ter bastante que ver co feito de que agora anuncien que o Motorola Razr volverá ao mercado cun novo modelo.
A nova xeración de Motorola Razr promete unha maior potencia, unha aparencia máis coidada e unha interface máis intuitiva, aínda que polo momento non dan detalles sobre o prezo e data de lanzamento, e polo momento só está previsto o seu lanzamento en China. Conseguirá o novo smartphone encartable gañar relevancia ou quedará nunha anécdota coma os seus predecesores?