Presentada unha escolla dos mellores produtos TIC para o sector marítimo desenvolvidos en Galicia e noutros catro países

Santiago acolleu hoxe a presentación do BAT (Best Available Tecnologies), un catálogo que escolma as tecnoloxías máis salientábeis, todas elas dispoñíbeis, para mellorar a xestión, a actividade, a produtividade, a eficiencia e a rendibilidade das empresas galegas marítimas e, por extensión, de toda a ribeira atlántica europea. A selección, que abrangue 29 produtos e servizos TIC con orixe en cinco países, insírese nas liñas de traballo do proxecto europeo STAMAR, que se dirixe a fortalecer a competitividade e a innovación das PEME do sector, e no que participan, pola nosa terra, a Axencia de Modernización Tecnolóxica de Galicia (AMTEGA) e máis a Axencia Galega de Innovación (GAIN).
Ademais, xuntan forzas no proxecto sete entidades centradas na transferencia tecnolóxica, a innovación e a economía marítima de Francia, Reino Unido, Irlanda e Portugal.
A presentación do BAT, fai saber AMTEGA, é o eixo central da primeira das xornadas divulgativas de STAMAR para PEME, asociacións e entidades públicas e privadas do ámbito marítimo, que foi inaugurada hoxe no Centro de Novas de Galicia pola directora da axencia, Mar Pereira, o director da GAIN, Manuel Varela, e a secretaria xeral técnica da Consellería do Medio Rural e do Mar, Isabel Concheiro.
Segundo engaden máis en detalle AMTEGA e GAIN, o catálogo presentado en Santiago é un documento exhaustivo no que se achegan referencias e información sobre 29 tecnoloxías, cunha media de entre tres e seis solucións por socio. En Galicia identificáronse un total de 23 tecnoloxías relevantes polo que se decidiu, ademais de incluír unha selección no BAT, elaborar un catálogo específico de tecnoloxías galegas para difundir o potencial da Comunidade neste eido. “Ambos documentos”, explican as axencias da Administración autonómica, “servirán para dar a coñecer estes avances tecnolóxicos ao sector marítimo e tamén para fomentar o coñecemento a nivel comunitario destes produtos tecnolóxicos e dos centros e empresas TIC que os desenvolveron, contribuíndo a apertura de novas oportunidades de mercado.”
Ademais da elaboración do BAT, STAMAR abrangue outras iniciativas como o estudo Identificación das necesidades tecnolóxicas do sector para coñecer o nivel de integración das TIC nas empresas deste ámbito e cales son as súas demandas no eido tecnolóxico. Tamén inclúe a creación dun Centro Transnacional Demostrador de tecnoloxías, que se nutrirá en boa medida da bagaxe xerada polo Centro Demostrador TIC de Galicia, que como lembraremos serve para xuntar, nun único escenario, aos desenvolvedores galegos de produtos tecnolóxicos innovadores e os potenciais usuarios e demandantes dos mesmos.
No que se refire ás actividades de divulgación en Galicia, recordar que xunto coa xornada de hoxe en Santiago están previstas outras tres adicadas ao sector naval e as tecnoloxías relacionadas coa seguridade marítima e a xestión portuaria. En colaboración coa GAIN celebraranse, tamén, dous eventos de co-creación, que, en palabras da axencia, “servirán de punto de encontro entre centros tecnolóxicos e PEME do marítimo para fomentar a creación de proxectos conxuntos”.