Presentan en China os Honor V30 e V30 Pro con procesador Kirin 990 e conectividade 5G

Aínda que polo momento continúa sen solucionarse o conflito de Huawei cos EE.UU., de xeito que a comercialización dos novos móbiles da marca chinesa resultan practicamente inviable fóra de China, a compañía non cesa os seus lanzamentos (en boa medida porque os seus resultados en China son magníficos), e agora amplía a súa marca económica presentando os novos smartphones Honor V30 e Honor V30 Pro, que son auténticos dispositivos de gama alta que fan pequenas concesións para poder reducir considerablemente o seu prezo.
Temos así que o Honor V30 é un smartphone cun potente procesador Kirin 990, 6/8 GB de RAM, 128 GB de almacenamento interno, pantalla IPS Full HD+ de 6,57 polgadas, cámara traseira tripla de 40, 8 e 8 Mpíxeles, cámara frontal dupla de 32 e 8 Mpíxeles (integrada nun orificio en pantalla), lector de pegadas lateral, NFC, Bluetooth 5.0, Wi-Fi AC, batería de 4.200 mAh con carga rápida de 40 watts e, como grande detalle a ter en conta, conectividade 5G (SA e NSA) por un prezo de 3.299 iuans (425 euros) con 6 GB de RAM e 3.699 iuans (477 euros) con 8 GB de RAM.
O Honor V30 Pro pola súa banda inclúe 8 GB de RAM en todas as súas versións e 128/256 GB de almacenamento interno, e a súa batería baixa até os 4.100 mAh pero engadindo carga sen fíos a 27 watts e carga sen fíos inversa. O modelo con 128 GB de capacidade véndese a 3.899 iuans (503 euros), mentres que por 4.199 iuans (541 euros) está dispoñible o modelo con 256 GB de almacenamento interno.
Non sabemos se estes móbiles chegarán oficialmente a Europa, pero de ser así poderían xogar un importante rol na popularización dos smartphones con 5G.