Presentan en China os novos Redmi Note 11

Xiaomi presentou hoxe para o mercado chinés a nova familia de móbiles Redmi Note 11, composta polos terminais Redmi Note 11 5G, Redmi Note 11 Pro e Redmi Note 11 Pro+, e que nos vindeiros meses probablemente se convertan en auténticos supervendas no noso territorio.
O modelo máis básico, o Redmi Note 11 5G, funcionará cun procesador MediaTek Dimensity 810, 4/6/8 GB de RAM, 128/256 GB de almacenamento, pantalla LCD Full HD+ de 6,5 polgadas cun refresco de 120 Hz, cámara traseira principal de 50 Mpíxeles e grande angular de 8 Mpíxeles, cámara frontal de 16 Mpíxeles, conector para auriculares, emisor de infravermellos, batería de 5.000 mAh con carga rápida de 33 watts (completaría a súa carga en 62 minutos), e con prezos de entre 1.199 e 1.699 iuans (161-227 euros), facendo moi accesible a conectividade 5G.
Para usuarios máis esixentes estaría o Redmi Note 11 Pro, cun procesador MediaTek Dimensity 920, 6/8 GB de RAM, 128/256 GB de almacenamento, pantalla AMOLED Full HD+ de 6,67 polgadas cun refresco de 120 Hz, cámara traseira de 108 Mpíxeles, grande angular de 8 Mpíxeles e telemacro de 2 Mpíxeles, cámara frontal de 16 Mpíxeles, altofalantes estéreo JBL con Dolby Atmos e unha batería de 5.160 mAh con carga rápida de 67 watts (cargaríase ao 100% en só 43 minutos), que venderase a prezos de entre 1.799 e 2.199 iuans (241-294 euros).
Por outra banda, o Redmi Note 11 Pro+ sería basicamente igual que o anterior pero cunha batería de 4.500 mAh que sería a primeira da marca Redmi en incorporar carga rápida de 120 watts, o que permitiría completar a súa carga en só 15 minutos. O seu prezo estaría entre os 1.999 e os 2399 iuans (268-321 euros).