Presentan en China televisores con procesadores S4 de 4 núcleos

Os fabricantes chineses non se conforman con achegar potentes smartphones ao mercado, senón que agora atrévense tamén cos televisores e esta semana o provedor de contidos LeTV anunciou os seus Super TV, unha familia de televisores que integran tecnoloxía de Innovation Works, Qualcomm, Foxconn e Sharp.
Un dos televisores máis destacables desta nova gama sería o LeTV Super TV X60, que encerra nun corpo de aliaxe de aluminio un panel Full HD de 60 polgadas a 120 Hz e con soporte 3D, un procesador Snapdragon S4 Prime MPQ8064 de catro núcleos a 1,7 Ghz (con 2 Gb de RAM e gráfica Adreno 320) e Wi-Fi dual, de xeito que os servizos tipo Smart TV desenvólvense con soltura neste equipo que pode controlarse cun mando a distancia opción que integra xiroscopio (para funcionar dun xeito semellante a un mando da Wii). Tamén é posible equipalo con PrimeSense, un sensor semellante ao Kinect de Microsoft.
O seu prezo no mercado chinés será de 6.999 iuans (874,95 euros) e abriría o acceso a máis de 2.000 aplicacións para o televisor, máis de 90.000 episodios de series de televisión e unhas 5.000 películas de balde (grazas ao completo catálogo audiovisual de LeTV).
Máis asumible sería o televisor S40, que tería pantalla Full HD 2D de 39 polgadas e venderíase por 1.999 iuans (249,90 euros).