Preséntase en sociedade a empresa galega TTT Social Center

Hoxe, no Centro Social de Novacaixagalicia de Santiago de Compostela, tivo lugar a presentación oficial de TTT Social Center, empresa de nova creación, que ofrece servizos de grande demanda cunha perspectiva diferente, apostando dun xeito especial pola responsabilidade social corporativa, pois facilita a integración social dos seus traballadores, que serán preferentemente persoas con diversidade funcional, grazas ás facilidades que achegan as TIC.
O capital humano e a tecnoloxía posta ao seu servizo para a un primeiro plano en TTT, co obxectivo de favorecer a plena integración social de persoas con discapacidade, dando preferencia á súa contratación, igualdade de oportunidades, accesibilidade universal, deseño para todos e non discriminación. TTT ofrece servizos de contact center, accións de mercadotecnia social, telemarketing... dende o propio domicilio do seu persoal, grazas á tecnoloxía e o saber facer empresarial e social do tres promotores desta iniciativa: José María López Bourio (Noa Innova SL), David Belo Gacio (IP Global SL) e Enrique Varela (Tenyus Socialware SL).
Ante un nutrido grupo de representantes de empresas, institucións e entidades sociais, este tres emprendedores galegos desvelaron as calidades de TTT como empresa galega de alcance global, altamente innovadora tanto en tecnoloxías como na xestión do capital humano, ofrecendo servizos socialmente responsables por e para a sociedade, por e para aquelas empresas e entidades que desexen cubrir as súas necesidades de telemarketing, social media, etc. profesional e responsablemente.
O primeiro dos promotores en dirixirse aos asistentes esta mañá foi José María López Bourio, quen fixo un repaso á súa traxectoria como emprendedor, asegurando que, pese a estar moi a favor das asociacións de novos empresarios, a creación de empresas non debe ser exclusiva da mocidade, senón que o emprendemento non ten idade, como demostra el cos seus 61 anos na creación de TTT Social Center, que é a súa penúltima empresa (pois adiantou que xa está a traballar noutro novo proxecto). Tamén reivindicou o papel das empresas na creación de emprego e como motor da sociedade.

Pola súa banda, David Bello Gacio comentou a evolución da súa empresa en servizos de telemarketing, e como foi evolucionando ata unha serie de servizos desexados polos usuarios, fronte a outros servizos intrusivos aos que por desgraza estamos tan afeitos, subliñando que as novas solucións que están a xurdir dende compañías como a súa están a permitir que incluso os negocios de pequenas dimensións poidan ter servizo de atención telefónica (e outros sistemas de atención ao cliente), aínda que tras coñecer a outro dos promotores de TTT, Enrique Varela, veu que tamén podía darse unha volta ao xeito de entender este tipo de servizos, optando por a perspectiva dos traballadores, concepto que sería a semente deste novo proxecto.

Enrique Varela destacou as vantaxe que ofrecen dende TTT ao contratar a persoal segundo as necesidades do cliente, cunha aposta tanto social como de proximidade

Varela non só argumentou que existe unha masa social de persoas con dificultades para integrarse no mercado laboral, e que as solucións tecnolóxicas poderían superar tal atranco, senón que incluso incidiu no feito de que, ao utiliza unha fórmula de teletraballo dende TTT, é posible que os servizos de atención ao cliente das compañías non estean situados ao outro lado do Atlántico, senón que os traballadores que atendan ás consultas estean na nosa proximidade, falando as distintas linguas estatais cos nosos xiros lingüísticos (o que claramente facilita a comunicación) e mesmo coñecendo o noso contorno, o que pode resultar de grande utilidade, por exemplo, dende un servizo de información municipal (010), xa que dende TTT poden mobilizar traballadores alí onde sexan precisos, para formalos e incorporalos á súa familia, e así dar un servizo claramente diferenciado.
A nova empresa xa está a dar os seus primeiros pasos, conseguindo as súas primeiras contratacións, e anunciando que nas vindeiras semanas vai organizar distintas actividades para darse a coñecer polo resto de España, no que agardan que axuden á súa proxección comercial, para facer realmente viable un proxecto moi esperanzador para todo aquel que teña dificultades de integración laboral por mor dunha diversidade funcional.