Preto de 150 investigadores da UDC celebrarán a Noite Europea das Persoas Investigadoras
martes, 27 de setembro do 2022
O
reitor da Universidade da Coruña, Julio Abalde, o concelleiro de Educación da
Coruña, Jesús Celemín, a directora da Unidade de Divulgación Científica e
Cultural da UDC, Cristina Naya, e a directora Técnica do Centro de
Investigacións en Tecnoloxías Navais e Industriais (CITENI) de Ferrol, Anne
Gosset, presentaron
esta mañá na Reitoría as actividades previstas pola UDC para a Noite Europea
das Persoas Investigadoras, que terán lugar o vindeiro 30 de setembro e nas
que xuntarán a preto de 150 persoas entre persoal investigador e técnico.
A UDC, a
través da Unidade de Divulgación Científica e Cultural, súmase por segunda vez
a esta celebración que se desenvolve de forma simultánea en 400 cidades de
Europa. En Galicia están organizadas polas tres universidades públicas con
actos nas sete cidade baixo o nome de G-NIGHT.
O reitor explicou que unha das funcións da Universidade é
divulgar a ciencia e “nunha cidade como A Coruña, cunha rede de museos
científicos e un museo nacional é difícil estár á altura, polo que agradezo
especialmente a colaboración do Concello”. Para Abalde “os nosos investigadores
son capaces de facer investigación de vangarda e explicar de forma divulgativa
a ciencia e a tecnoloxía”, e resaltou a importancia de achegala sobre todo aos
rapaces e rapazas máis novos tanto para espertar vocacións científicas como
para mantelas na educación secundaria e no bacharelato. O concelleiro de
Educación subliñou a aposta do goberno local pola ciencia e declarou que “me
parece esplendoroso e emocionante que en toda Europa se desenvolvan actividades
de ciencia” de forma simultánea. “A Coruña é unha cidade científica”, definiu e
animou a toda a cidadanía a participar das actividades propostas pola
Universidade da Coruña para esta celebración.
Neste sentido, a directora da Unidade de Divulgación
Científica e Cultural da UDC, Cristina Naya, detallou as diversas actividades propostas
pola UDC pensadas para acoller a máis de 2.000 persoas (1.500 na cidade da
Coruña e 600 en Ferrol). Pola súa banda, a directora técnica do Centro de
Investigacións en Tecnoloxías Navais e Industriais (CITENI) de Ferrol, Anne
Gosset, explicou as previstas para o Campus Industrial de Ferrol.
Durante a xornada os asistentes terán a oportunidade de
participar en obradoiros, charlas divulgativas, rutas científicas,
experimentos, conferencias, dirixidas para todo tipo de público: infantil,
xuvenil, familiar, escolar, adulto etc. independentemente da súa formación e
coñecementos. Todas as actividades son de balde.