Primux incrementa as prestacións do seu buque insignia, o terminal Sigma
luns, 6 de outubro do 2014
O fabricante galego
Primux amosou co comezo desta semana a
segunda vida do seu Primux Sigma, un aparello que
xa dimos a coñecer dende Código Cero a pasada primavera,
salientando daquela que se trataba con toda seguridade do “buque
insignia” da marca ourensá de dispositivos avanzados. Pois ben,
dada “a gran acollida” que tivo ao longo destes meses o Sigma no
mercado dos terminais de gama media, sobre todo grazas ao seu amplo
abano de prestacións e o seu prezo “máis que alcanzábel”, o
fabricante galego púxose mans á obra para mellorar o dispositivo
engadíndolle aínda máis prestacións, e, aquí vén o mellor do
conto, mantendo o mesmo prezo.
Segundo engade a
compañía, as evolucións do Sigma céntranse sobre todo na súa
pantalla, que agora incorpora un cristal DragontrailTM, un elemento
“altamente resistente ao raiado, aos impactos e a torsión”.
Ademais, a base da pantalla é un panel L5 de cinco polgadas, o
modelo IPS HD Truly de 1.280 por 720.
Por outra banda, tamén
se incorporou un novo sistema de redución de ruído no micrófono,
que permite illar o son ambiente da voz. Pero hai máis, xa que o
Sigma remodelado inclúe tamén o sistema operativo Android 4.4 Kit
Kat, unha ferramenta que en palabras de Primux, “consegue optimizar
ao máximo os recursos, a arquitectura e prestacións do smartphone
para unha maior rapidez nos procesos cun menor consumo de batería”.
Por outra banda, cómpre
informar que o aparello acubilla un procesador Quad Core de 1,3 GHz,
moi importante para permitir a execución e o procesado áxil de
calquera aplicación, ben sexa de ofimática, de reprodución
audiovisual ou ben vencellada a un videoxogo. O Sigma conta tamén
con 1 Gb de memoria RAM e 16 de capacidade de almacenamento interno.
Segundo conclúe Primux, a todo o devandito hai que engadir a
inclusión de todos os sistemas precisos para acadar as mellores
comunicacións e conexións posíbeis, como por exemplo o sistema NFC
(tecnoloxía de comunicación sen fíos, de curto alcance e de alta
frecuencia, que posibilita o intercambio rápido e eficaz de datos
entre dispositivos), a tecnoloxía 3G, o Wi-Fi de alta velocidade, a
versión 4.0 de Bluetooth, o GPS e o sistema Dual SIM que permite
acubillar dúas liñas telefónicas.