Pulo definitivo aos novos hubs tecnolóxicos liderados por Ceaga e Bioga

A Consellería de Economía asinou hoxe con Ceaga (Clúster de Empresas de Automoción de Galicia) e Bioga (Clúster Tecnolóxico Empresarial das Ciencias da Vida) dous acordos para a posta en marcha doutros tantos hubs de innovación dixital liderados polas dúas devanditas plataformas empresariais. Dotado cada un dos convenios con 200.000 euros, permitirán, en palabras de Francisco Conde, conselleiro de Economía, apoiar o funcionamento destas iniciativas estratéxicas lideradas pola industria para achegar ás pequenas e medianas empresas galegas as tecnoloxías asociadas á fábrica do futuro e a transformación dixital.
Trátase das iniciativas Factories of the future (Fábricas do futuro), liderada por CEAGA e centrada na Internet das Cousas e a Intelixencia Artificial; e Datalife, liderada por Bioga, e que pon o foco no manexo de grandes cantidades de información (Big Data).
Ademais do asesoramento preciso para a súa axeitada articulación, prevese destinar aos hubs e aos seus usuarios 30 millóns de euros de apoios públicos.
Tal e como sinalou o conselleiro na sinatura dos acordos, a firma destes dous convenios “permite construír desde xa o futuro industrial de Galicia ofrecendo ferramentas e formación para entender o novo contexto de transformación dixital”. E engadiu: “Os hubs deben servir para espallar a cultura da I+D+i nas nosas empresas, particularmente nas PEME”, asegurou.
O proxecto das fábricas do futuro impulsado por Ceaga beneficiará a sectores como o motor, o agroalimentario, o naval, o forestal e o téxtil; mentres que Datalife, impulsado por Bioga, prevé ofrecer servizos ás cadeas de valor da biotecnoloxía, a saúde, o forestal, o agroalimentario e o ámbito mar-industria.
Estas iniciativas contan coa participación doutros clústeres, centros tecnolóxicos, grandes empresas tractoras e compañías tecnolóxicas, ademais das universidades. No caso do primeiro participan clústeres como ACLUNAGA, CLUSAGA e o Clúster TIC; empresas tractoras como Nova Pescanova, CLUN, Textil Lonia, Freire, PSA, GKN, ENCE, CUPA ou Navantia; compañías do eido tecnolóxico como Televés e R; así como os centros Aimen, ANFACO-CECOPESCA, CESGA, CTAG, CETIM, Gradiant e ITG; ademais das tres universidades galegas e de FEUGA.
No hub liderado por Bioga, entre os participantes repiten CLUN, Nova Pescanova, Televés, CLUSAGA, o Clúster TIC, CESGA, Gradiant, ANFACO-CECOPESCA e a Universidade de Santiago. A maiores, colaboran outras empresas (como Mestrelab, CZ Veterinaria, FINSA e Vodafone España) e clústeres (como o da Saúde e o da Madeira), así como a Fundación Kaertor.