Qualcomm estaría interesada en adquirir Intel

The Wall Street Journal publica hoxe que Qualcomm tería a intención de adquirir Intel, o que sería unha das operacións do sector máis importantes da historia, cunha valoración próxima aos 93.000 millóns de dólares, polo que podemos entender que Qualcomm quere aproveitar a mala situación económica de Intel (que ten a acción no contorno dos 20 dólares cando hai 3 anos chegou a superar os 67 dólares) para desfacerse dun importante rival.
O acordo de compra está lonxe de estar confirmado (The New York Times asegura que polo momento as negociacións limitaríanse a unha toma de contacto), especialmente porque os organismos reguladores da competencia podería pór atrancos á creación de semellante xigante no sector dos semicondutores ao xuntar as empresas de referencia de procesadores para móbiles e para ordenadores persoais.
De realizarse a operación sería especialmente interesante o seu impacto nas arquitecturas dos equipos informáticos no futuro, pois non podemos esquecer como Apple está a apostar decididamente por procesador ARM (nos que está especializado Qualcomm) polo que de colocarse Intel baixo o paraugas de Qualcomm podería inclinarse a balanza a favor de tecnoloxías de procesador eficientes.