Qualcomm presenta un sistema de carga rápida a máis de 100 watts

Nas últimas semanas varios fabricantes chineses presumían de sistemas de carga rápida para smartphones, como a tecnoloxía Flash Charge de Oppo, pero este tipo de solucións non serán exclusiva duns poucos, senón que tamén chegarán á grande masa de fabricantes xa que a propia Qualcomm vén de presentar Quick Charge 5, asegurando que é a primeira plataforma comercial do mundo con carga a máis de 100 watts, conseguindo mellorar até un 70% a eficiencia fronte á anterior versión desta tecnoloxía e presumindo de facer posible a carga da metade dunha batería en 5 minutos.
Qualcomm asegura que a súa solución é a máis rápida do mercado para dispositivos con Android, multiplicando por 10 a entrega de enerxía que facía coa súa primeira versión de Quick Charge, conseguindo así atender a unha demanda dos consumidores que, agora que por fin se normalizou que os smartphones teñan capacidade dabondo para aguantar todo o día, esixen velocidades de carga rápidas para situacións puntuais nas que precisan dunha pequena recarga para poder garantir que poden rematar a xornada en xornadas especialmente intensivas.
A tecnoloxía Qualcomm Quick Charge 5 consegue cargas a alta velocidade mantendo a seguridade da operación, con 12 medidas de protección separadas e conseguindo que a carga función a 10 graos centígrados menos que Quick Charge 4 (o que alonga a vida das baterías).
Actualmente hai máis de 1.200 dispositivos móbiles que fan uso da tecnoloxía de carga rápida de Qualcomm, polo que é de esperar que esta nova versión vaia chegar a numerosos smartphones no terceiro trimestre do ano, sendo compatible con procesadores Qualcomm Snapdragon 865, 865 Plus e outros procesadores futuros de alta gama.