R activa a tecnoloxía VoLTE nas súas liñas móbiles

O operador R está a informar aos seus clientes dunha mellora no servizo que está dispoñible dende hai semanas: a posibilidade de realizar chamadas de voz a través de 4G. O servizo de VoLTE supón un salto de calidade nas chamadas de voz dende o móbil e tamén consolidan o salto ao 4G de cara ao apagamento da rede 3G previsto para finais de ano na rede de MasOrange.
As chamadas mediante VoLTE ofrecen unha maior calidade de son (pois a voz transmítese en HD), o establecemento de chamada é máis rápido, é posible falar polo móbil mentres se fai uso da Internet no mesmo e reduce o consumo de enerxía.
Para saber como tirar proveito desta tecnoloxía na páxina de axuda do operador informan sobre como activala en móbiles iPhone e Android, aínda que na meirande parte dos dispositivos non será algo do que preocuparse xa que a funcionalidade operará sen que o usuario teña que mudar nada na configuración do seu dispositivo móbil.