R analiza en GaliciaTIC solucións combinadas de imaxe, vídeo e IA para acadar a plena dixitalización

Comezou a edición número 20 de GaliciaTIC, o foro do sector TIC de meirande antigüidade na nosa terra, e entre as grandes protagonistas do congreso atópase a operadora de orixe galega R, colaboradora do evento e patrocinadora dende hai cinco anos. A empresa encargouse tamén de organizar e coordinar unha mesa temática sobre a chamada hiperautomatización, baseada en combinar solucións tecnolóxicas a prol da dixitalización e da sustentabilidade dos negocios. GaliciaTIC estase a celebrar entre este mércores 19 e o xoves 20, no auditorio do Edificio Fontán da Cidade da Cultura (Santiago).
Na mesa redonda, desenvolvida a primeira hora deste mércores, afondouse no concepto cada vez máis estendido de hiperautomatización, metodoloxía clave para competir cos mercados máis desenvolvidos e avanzados do mundo.
Baixo o título Imaxe, vídeo e Intelixencia Artificial, claves da hiperautomatización das empresas, Alberto Díaz Freire, responsábel de Transformación Dixital de R, encargouse de moderar e coordinar a mesa de traballo. Ademais, nela interviñeron os expertos Antonio Rodríguez del Corral, director executivo (CEO) da empresa galega Cinfo, Xoel Váquez, CEO e fundador de Xoia Reality e Alexandre Bastos, fundador de Áncora.
A idea foi explicar de que maneira esa hiperautomatización estase a converter nunha verdadeira aliada de futuro para asegurar a dixitalización total e os procesos sustentábeis nas empresas baseándose en solucións tecnolóxicas combinadas. En concreto falouse de como se pode artellar o tratamento de imaxe e vídeo nas propostas da Intelixencia Artificial e máis do emprego doutras iniciativas baseadas en Realidade Virtual. Estas dúas van ser, coincidiron, ferramentas clave á hora de dixitalizar e automatizar por completo os procesos empresariais, o que lles permitirá ás firmas xerar novos ingresos e optimizar o traballo dos negocios.