R incrementa as canles de balde para prolongar o lecer e a formación dos escolares
martes, 24 de marzo do 2020
A
operadora galega R achegou
hoxe novidades importantes para mitigar a
reclusión das familias derivada do estado de alarma e facer máis
levadío o seu confinamento. Segundo fixo saber nun comunicado,
nestes intres redobráronse os esforzos para garantir a conectividade
e os servizos de calidade ofrecidos mediante a súa rede de fibra
fixa e móbil. Isto tradúcese en máis operatividade móbil e máis
contidos para a súa grella de TV.
En
base ao devandito, achéganse novas canles infantís e educativas de
balde para os seus clientes). Ás xa incorporadas a semana pasada ao
comezo da crise sanitaria (Panda, Disney Junior, Disney XD) súmanse
agora Baby TV, Nick e Nick Jr., que estarán dispoñíbeis nos diais
habituais: Nick Jr, dial 150; Nick, dial 151; Baby TV, dial 153;
Disney XD, dial 160, Disney Junior; dial 161 e Panda, dial 162.
As
medidas extra postas en marcha hoxe polo operador tradúcense tamén
en engadidos á grella de contidos divulgativos e formativos, como
por exemplo a vindeira incorporación do especial programado por
Canal Historia en rebobina con máis de 25 programas históricos. O
obxectivo desta iniciativa en concreto é prolongar, na medida do
posíbel, a actividade docente dos estudantes que, por mor do estado
de alarma, non poden seguir cos seus estudos presenciais nin acudir
aos centros educativos. “Queremos que os estudantes teñan a
posibilidade de aprender historia de forma entretida cunha selección
de series e documentais de corte didáctico sobre sete temáticas:
Prehistoria, Civilizacións, Historia Clásica, Primeira e Segunda
Guerra Mundial, Historia de España e Misterios”, explicou a
operadora galega, engadindo que todas estas canles incorpóranse á
proposta televisiva de R “de forma automática” para todos os
clientes, “con independencia do paquete de televisión que teñan
contratado e sen que teñan que facer nada”.