R leva a súa rede de última xeración a 280 empresas e fogares do Vilar, na Estrada
venres, 5 de xuño do 2020
A
operadora R vén de facer balance das
súas actuacións recentes no concello da Estrada, destinadas a
conectar a Internet un número significativo de fogares e negocios do
termo municipal, achegándolles até 500 Mbps simétricos. Os
traballos focalizáronse no núcleo do Vilar onde arredor de 130
residencias particulares e empresas xa poden gozar das redes de nova
xeración da firma galega de telecomunicacións, unha cifra que se
incrementará con 150 unidades máis en datas vindeiras. A
intervención de R consistiu no fornecemento de fibra óptica de
última xeración (tecnoloxía FTTH) e desenvolveuse aproveitando “ao
máximo” as infraestruturas do concello.
En
virtude dos traballos realizados, as ditas empresas e fogares poderán
recibir servizos avanzados de teléfono, Internet de ata 500 Mpbs
simétricos e televisión dixital multicanle de R. En total,
estariamos a falar de 280 firmas e domicilios potencialmente usuarios
dos servizos da operadora.
A
compañía lembra que estes fitos acabados de acadar son froito de
anos investindo no despregue de redes na Estrada, onde a día de hoxe
xa dispoñen da cobertura das redes de nova xeración de R un total
de 5.790 fogares e empresas do municipio.
10
millóns de investimento e fondos europeos
Estes
e outros traballos na provincia de Pontevedra forman parte dun dos
tres proxectos do Plan PEBA-Avanza do Ministerio de Economía e
Empresa dos que R resultou adxudicataria en 2018 para despregar,
antes de 2021, a tecnoloxía FTTH en 512 núcleos de Galicia que non
dispuxeran de alta velocidade ata o momento (“zonas brancas”). No
desenvolvemento dos tres plans investiranse un total de 10M€, dos
cales preto de 8M€ serán subvencionados polos fondos FEDER da
Unión Europea. En concreto, a intervención na Estrada encádrase no
proxecto destinado á extensión de redes de nova xeración en 162
núcleos do centro-oeste de Galicia (norte de Pontevedra, sur da
Coruña e oeste de Lugo). O investimento total neste caso é de
3,58M€, 2,86 deles subvencionados polos fondos FEDER da Unión
Europea.
Un
segundo proxecto fala igualmente do fornecemento de banda larga de
nova xeración con tecnoloxía FTTH, desta volta en 154 núcleos de
municipios do noroeste de Galicia (A Coruña, norte de Pontevedra e
oeste de Lugo). Para estas actuacións, cun investimento total de
2,6M€ destinarase unha axuda dos fondos FEDER de 2,09M€.
O
terceiro dos proxectos adxudicados desenvolverase en 196 núcleos
doutros municipios do suroeste de Galicia (Pontevedra). Os despregues
nestas zonas suporán un investimento total de 3,75M€, cunha
subvención dos fondos FEDER de máis de 3M€.