R ofrece chamadas internacionais, SMS e itinerancia de balde ante a emerxencia humanitaria en Venezuela

Co obxectivo de facilitar as comunicacións nun momento especialmente crítico debido á catástrofe humanitaria provocada polo terremoto en Venezuela, a operadora galega R puxo en marcha un conxunto de medidas extraordinarias para axudar os seus usuarios a manterse conectados co país caribeño.
Máis polo miúdo, a compañía galega ofrecerá de forma gratuíta as chamadas a móbiles internacionais, así como o envío de SMS desde España a Venezuela para os seus clientes.
En palabras de R, “esta iniciativa busca facilitar a comunicación con familiares, amigos e achegados nunha situación de especial dificultade polas consecuencias dos movementos sísmicos das últimas horas”.
Así mesmo, R tamén aplicará a itinerancia gratuíta (o roaming) tanto en servizos de voz como de datos, a aqueles clientes que se atopen actualmente en Venezuela, co fin de que poidan comunicarse sen restricións con España e informar sobre a súa situación aos seus seres queridos.
Estas medidas especiais no tráfico telefónico aplicaranse tanto a clientes residenciais como de empresa e permanecerán activas mentres sexa necesario, en función da evolución e o alcance da emerxencia humanitaria.
A compañía está, ademais, mobilizando aos seus empregados para impulsar iniciativas solidarias que contribúan a apoiar á poboación afectada, canalizando o seu compromiso e colaboración en favor de quen máis o necesitan nesta situación de emerxencia.