R, recoñecida pola súa xestión ambiental de cero emisións de carbono

A operadora de orixe galega R vén de ser recoñecida pola súa xestión ambiental ao alcanzar o obxectivo de cero emisións netas de carbono e co certificado de Xestión Enerxética ISO 50001, norma que reflicte o bo desempeño enerxético da organización e a súa contribución para xestionar e reducir o consumo de enerxía.
Segundo explica a empresa de telecomunicacións con sede principal na Coruña, o certificado de cero emisións foi expedido por CEROCO, pertencente á Fundación ECODES, cuxo obxectivo é “lograr os Obxectivos de Desenvolvemento Sustentábel (ODS) e o cumprimento do Acordo de París”.
R destaca que “conseguir cero emisións netas de carbono significa, ademais de ter un balance neutro de CO2, reducir ditas emisións ao máximo e, polo menos, cunha traxectoria orientada a limitar o quecemento global a 1,5 oC”. A empresa engade que o devandito fito da neutralidade das emisións implica ademais “lograr un estado no que a nosa cadea de valor non provoque ningunha acumulación neta de dióxido de carbono na atmosfera, compensando as emisións residuais a través de proxectos de plantación de árbores”.
R reduciu as súas emisións de carbono nun 96% en só tres anos, pasando de 7.159 toneladas de CO2 en 2018 a preto de 300 toneladas en 2021, que a compañía compensou con plans de reforestación.
Ademais do certificado de Xestión Enerxética ISO 50001, R superou con éxito a auditoría de seguimento e renovación das certificacións ambientais coas normas ISO 14001 de Xestión Ambiental, Regulamento Europeo EMAS, unha auditoría que incluíu a verificación das declaracións ambientais de Euskaltel, R e Telecable.