R rexistrou un aumento na cota da TVG dun 30% durante a alarma sanitaria
xoves, 9 de xullo do 2020
A
operadora R fixo un novo balance da
actividade dos seus servizos durante a alarma sanitaria, desta volta
poñendo o foco no plano audiovisual, que, por razóns obvias, foi un
dos grandes protagonistas (unha das grandes alternativas de lecer
para as familias confinadas) durante o período máis crítico da
pandemia. Segundo informou a operadora galega, os contidos
televisivos locais ou rexionais e a información máis próxima foron
as opcións máis elixidas polos clientes durante a crise da COVID,
“sobre todo para seguir de actualidade relativa á evolución da
pandemia nas semanas de confinamento”. Neste senso, a TVG acadou un
incremento de cota de pantalla do 30% con respecto á rexistrada a
principio de ano.
Desta
maneira, a canle autonómica resultou ser unha das cinco canles máis
visitas durante o período de reclusión nos fogares polos
espectadores e clientes da operadora. Este consumo de contidos
centrouse sobre todo na programación en directo, tanto na canle
principal da Televisión de Galicia como na TVG2 (máis centrada en
espazos infantís e xuvenís, culturais, documentais, redifusións da
primeira canle e contidos deportivos os fins de semana). O seguimento
tamén se apercibiu na programación en diferido ou baixo demanda,
onde a audiencia de R, sinala a operadora, “puido aproveitar todas
as funcionalidades dos seus descodificadores 4k”.
A
compañía galega tamén fixo saber que durante os devanditos meses o
consumo medio acumulado dos/as espectadores/as da TVG clientes/as de
R superou as 12 horas, “o que supón un consumo medio por persoa
superior aos 40 minutos diarios”.
No
seu novo balance, R sinala a maiores que nos meses anteriores ao
verán, o confinamento traduciuse en “porcentaxes de consumo
televisivo insospeitados ao principio do ano”, o que se reflicte
na taxa de visualización media diaria de TV (un 45% máis do
habitual) e no medre dos consumos de contidos infantís, que chegaron
a crecer un 48%.
No
informe tamén se achegan datos por idades, e especifícase que a
visualización de TV infantil que máis se incrementou foi a da
grella destinada a menores de catro anos, xa que se multiplicaron por
9 os seus rexistros habituais. En canto ao consumo de televisión
para maiores de catro anos, chegou a medrar un 29% e un 54% os
contidos para preadolescentes.