R terá acceso aos servizos 5G máis avanzados tras o acordo de MasOrange con Ericsson

A clientela do operador galego R poderá beneficiarse dunha nova xeración de servizos móbiles tras o acordo estratéxico asinado polo grupo MasOrange coa multinacional sueca Ericsson para modernizar a súa infraestrutura de rede. A alianza permitirá desenvolver unha plataforma unificada de datos 5G para todas as marcas do grupo e facilitará o lanzamento de novos servizos baseados nesta tecnoloxía.
O acordo supón un paso máis na integración tecnolóxica culminada tras a fusión entre Orange e MásMóvil, que deu lugar ao grupo MasOrange. A nova arquitectura de rede, baseada nun Core de Datos 5G SA común para todas as marcas do operador, busca ofrecer unha infraestrutura máis robusta, segura e eficiente, ao tempo que abre novas posibilidades para empresas, administracións públicas e desenvolvedores.
Entre as capacidades que habilitará esta plataforma destacan aplicacións avanzadas de realidade aumentada, videochamadas inmersivas, servizos IoT de gran escala ou o chamado slicing de rede, que permite crear múltiples redes virtuais independentes sobre a mesma infraestrutura física. Estas funcións facilitarán tamén novas solucións para ámbitos como a industria 4.0, a automoción, a loxística ou o entretemento dixital.
A nova infraestrutura permitirá mellorar parámetros clave da conectividade, como a latencia, a fiabilidade ou a estabilidade do servizo. Segundo explica o operador, a rede será capaz de adaptarse de maneira máis precisa ás necesidades de cada aplicación, o que se traducirá nunha experiencia máis fluída para os usuarios e nunha maior capacidade para soportar servizos que requiran conexións de alta velocidade e baixa latencia.
Para o tecido empresarial, o novo Core 5G SA abre a porta á creación de novos modelos de negocio baseados en servizos dixitais avanzados. As empresas poderán dispoñer de particións específicas da rede con calidade garantida para usos concretos, como transmisión de vídeo en tempo real ou operacións industriais conectadas.
O acordo tamén incorpora varias solucións tecnolóxicas de Ericsson destinadas a optimizar o funcionamento da rede. Entre elas figuran ferramentas para mellorar a eficiencia do tráfico de datos móbiles, sistemas de xestión avanzada de dispositivos conectados e plataformas que permiten automatizar e analizar o comportamento da rede para optimizar a experiencia dos usuarios.
Outro dos aspectos destacados da nova infraestrutura é a súa orientación cara á eficiencia enerxética. As aplicacións do Core 5G SA integran funcionalidades que reducen o consumo eléctrico e contribúen a diminuír o impacto ambiental da rede, reforzando a estratexia de sustentabilidade do grupo.
O director de R e de MasOrange en Galicia, Alfredo Ramos, subliñou que este acordo permitirá ao operador galego beneficiarse «das vantaxes dunha das redes máis avanzadas de Europa», ao tempo que reforza a aposta do grupo pola innovación e polos servizos 5G de nova xeración.