Raspberry Pi estrea un módulo de cámara con IA

Nos últimos anos son moitos os proxectos que tiraron proveito dos produtos de Raspberry Pi para realizar solucións a medida, entre os que non fallan proxectos no ámbito da intelixencia artificial, para o que lanzaron un kit hai uns meses cun módulo capaz de realizar até 13 TOPS neurais, e agora complétano cunha cámara.
A Raspberry Pi AI Camera é basicamente un módulo para Raspberry Pi que inclúe un sensor de imaxe Sony IMX500 capaz de captar 10 imaxes por segundo cunha resolución de 4.056 x 3.040 píxeles ou até 30 imaxes por segundo cunha resolución de 2.028 x 1.520 píxeles, cun campo de visión de 78 graos e apoiando o procesamento das imaxes cun procesador neural RP2040.
Temos así unha solución para a construción de aplicacións que permiten detectar e rastrexar obxectos ou incluso recoñecer as posturas de persoas, o que pode resultar de grande utilidade para desenvolver software que recoñeza o contorno e actúe en consecuencia dun xeito automático, o que pode resultar de grande utilidade para solucións domóticas ou de seguridade, así como para moitos outros proxectos de I+D (como os de robótica) nos que a imaxe e o seu procesamento en tempo real xoguen un papel crucial.
O produto ten un prezo oficial de 70 dólares, o que en España tradúcese nuns 76,95 euros e en Francia nuns 80,40 euros.