Ray-Ban Stories, as lentes con cámara de Facebook

venres, 10 de setembro do 2021 Marcus Fernández

Pese ao estrepitoso fracaso das Spectacles de Snapchat, Facebook quere empregar ese camiño para dar lugar a novas experiencias, no que consideran que sería a primeira xeración das súas smart glasses, creadas en colaboración con Ray-Ban, de xeito que pretenden que esteamos ante un accesorio que combine moda e tecnoloxía, e poderán adquirirse (en 4 modelos e 5 cores distintas, e incluso coa posibilidade de graduar as lentes) por a partir de 299 dólares en EE.UU., Australia, Canadá, Irlanda, Italia e Reino Unido, estando xa dispoñible un formulario en España para recibir un aviso cando poidan adquirirse oficialmente no noso territorio.
Ray-Ban Stories integran un par de cámaras de 5 Mpíxeles para poder capturar momentos da nosa vida dende unha perspectiva en primeira persoa, facilitando o disparo de fotografías ou a gravación de vídeos de 30 segundos, podendo controlarse esta funcionalidade premendo un botón ou mediante ordes de voz. Amais, a lentes integran unha luz LED para que a xente que estea ao redor saiba cando as cámaras están gravando vídeo, aínda que realmente a prestación máis interesante para moitos usuarios será que as lentes non só integran 3 micrófonos para conseguir unha boa captación sonora, senón que tamén teñen altofalantes para poder usalas para realizar chamadas.
Os contidos capturados polas lentes poden logo xestionarse a través dunha aplicación para o móbil, de xeito que logo poden compartirse como se desexe (sen as limitacións que tiñan as Spectacles, que claramente estaban optimizadas para Snapchat), destacando que Facebook terá melloras específicas para a publicación dos contidos das Ray-Ban Stories na súa plataforma.
Estas lentes serían o primeiro produto de Facebook en colaboración con Essilor Luxottica, dentro dun acordo de colaboración de varios anos de duración, co que buscan mesturar tecnoloxía e moda.

Vídeo promocional das Ray-Ban Stories

PUBLICIDADE