Red.es quere incentivar entre empresas e autónomos o dominio “.es”

Co obxectivo de incrementar a presenza na Rede do núcleo do tecido empresarial español, a entidade pública Red.es, dependente do Ministerio de Industria, anunciou a posta en funcionamento dunha campaña de información, así como da inminente apertura dunha serie de xornadas formativas dirixidas ás pemes e ós traballadores autónomos españois. O obxectivo desta iniciativa é promover o dominio “.es”, incentivando o desenvolvemento do sitio web entre as empresas e facendo fincapé na necesidade de ter presenza na Rede.
As devanditas xornadas informarán sobre as vantaxes do “.es” e dos xeitos e canles para adquirilo, así como dos aspectos máis importantes que permitiron axilizar e abaratar as xestións para obter o dominio.
Segundo Red.es, dende que entrou en vigor a nova normativa, o ano 2006 pechouse cun incremento do 70 por cento respecto do ano anterior con 507.874 dominios; o pasado mes de febreiro, seguindo esta tendencia á alza, rexistráronse un total de 536.340 dominios “.es”.