Redegal amosará o seu potencial en comercio electrónico na feira eShow de Barcelona
venres, 7 de marzo do 2014
Redegal, empresa galega
de enxeñería dixital centrada en novos recursos tecnolóxicos e
desenvolvementos web, vén de anunciar que vai estar presente na
feira eShow de
Barcelona, edición 2014, a desenvolver os vindeiros días 12 e
13 de marzo no recinto Fira da cidade catalá. Sinalar que
Redegal participa por primeira vez neste evento coincidindo coa
celebración do seu décimo aniversario “e apoiada polos bos
resultados cultivados con grandes contas nacionais”, informa a
empresa galega, que tamén salienta a súa actividade en México,
país no que se asentou definitivamente a finais do ano pasado.
Para Redegal, a feira
eShow é o principal circuíto feiral na Península Ibérica e
Latinoamérica, dedicado ao comercio electrónico, a mercadotecnia en
liña, a hospedaxe web e a computación na nube, as redes sociais, as
tecnoloxías móbiles e a sinatura dixital. Lembrar que o evento non
é único nin fixo. Trátase, máis polo miúdo, de sete encontros
repartidos polas principais cidades de ámbalas beiras do Atlántico,
marcando Barcelona o evento inicial e reunindo ás mellores empresas
tecnolóxicas de España e do resto do mundo.
Redegal acudirá a esta
cita cun concepto de caseta innovadora coa que pretende transmitir de
xeito simbólico os valores de seu, “valores que imprimimos en cada
un dos nosos proxectos de deseño, operatividade, facilidade de uso e
carácter inmediato”, informa a firma galega. As persoas que
visiten o emprazamento de Redegal (caseta número 76), poderán
coñecer de primeira man “os últimos proxectos da empresa no
ámbito do comercio electrónico e das aplicacións móbiles, pero
tamén novas solucións e contidos dixitais para a optimización das
estratexias de venda e mantemento en liña de clientes”.
Entre estas solucións
salientaremos a ferramenta de software libre Wirebrush4SPAM para
plataformas web, comercio electrónico e comercio a través do móbil.
Segundo nos conta a empresa galega, trátase dun filtro que impide o
fluxo de correo lixo e que é completamente funcional e inmediato,
sendo a súa principal utilidade o peneirado de comentarios
introducidos nunha plataforma en liña. En termos de aplicación
práctica, esta ferramenta permitirá que a nosa web poida ter un
maior grao de interacción cos usuarios finais, ceibándoa dos
atrancos que achega a masiva difusión de mensaxes lixo.
Asemade, estará exposto
perante o público da feira un novo medio interactivo con contidos
dixitais para potenciar a implicación do cliente e máis a
integración das contornas en liña e fóra de liña.
Para dar conta destas e
outras tecnoloxías, estarán presentes na feira Gerardo Rodríguez,
director de Operacións de Redegal (que o día 13 de marzo ás 11.00
horas achegará o relatorio Do commerce ao ecommerce, unha
evolución natural, onde falará do proceso de adaptación que
ten que adoptar o comercio tradicional para vincular o mundo offline
co online),
e Hector Ferrando, director
comercial de Redegal (que abordará na mesma xornada e sobre a mesma
hora a cuestión da mobilidade e as facilitades que subministra para
pasar da publicidade en liña directamente ás vendas).