Redelibros organiza un obradoiro de microcontos online
mércores, 16 de febreiro do 2011
Redelibros, a rede social galega do libro,
logo do éxito de participación acadado no I
Concurso de Microcontos que organizou nos pasados meses de decembro e
xaneiro, vén de
convocar un obradoiro de escritura de
microcontos online,
dirixido a todas aquelas persoas interesadas nas técnicas específicas de
redacción desta orixinal modalidade literaria.
O taller, que impartirá
Xosé Manuel Eyré Val, crítico e especialista da denominada Literatura Mínima ou
Hiperbreve, está pensado para escritores e escritoras que queiran
profundizar os seus coñecementos neste tipo de literatura “máis vangardista” e conta cun total de 20 prazas.
As persoas interesadas
en participar neste curso, que por certo é de balde, xa teñen aberto o prazo de
inscripción, e o único requisito que se require é estar rexistrado como usuario
ou usuaria de Redelibros.
Para inscribirse, é
preciso enviar un correo electrónico a redelibros@redelibros.com, e seguir
as indicacións expostas nas bases do devandito
obradoiro, a disposición dos usuarios interesados na Rede.
Cada participante traballará
un máximo de catro microcontos, cunha extensión non superior a 500 palabras. Os
textos dos escritores e escritoras participantes serán publicados na Rede (tanto
as súas propostas iniciais como as resultantes do traballo do obradoiro) de xeito
que os usuarios e usuarias non participantes poderán seguir e comentar a
evolución dos microcontos.
Trátase, en
palabras da organización, “de potenciar a
literatura, dar visibilidade no mundo dixital aos autores e autoras e fomentar
a creatividade”.
