Remata no Campus de Ferrol a 2ª quenda do campamento Aventura STEM

A vicerreitora do Campus de Ferrol e Responsabilidade Social, Ana Ares, e o director do Campus Industrial de Ferrol, Marcos Míguez, despediron a última hora da mañá deste venres 3 de xullo aos 51 rapaces e rapazas, de entre 6 e 16 anos, que participaron, ao longo desta semana, na segunda quenda do Campamento Tecnolóxico de Verán Aventura STEM: Viaxe no Tempo.
Foi unha experiencia organizada (por terceiro ano consecutivo) por Play Code Academy en colaboración co Campus Industrial de Ferrol. A primeira quenda desta proposta lúdico-formativa tivo lugar do 24 ao 26 de xuño e reuniu a 33 nenos e nenas.
A Facultade de Humanidades e Documentación e o Edificio de Apoio ao Estudo foron os espazos nos que a rapazada aprendeu a programar drons para mapear xacementos arqueolóxicos, construíu robots pintores para axudarlle a artistas moi coñecidos e coñecidas nos nosos días e desenvolveu sistemas de alerta para protexer os nosos refuxios prehistóricos.
Os rapaces e rapazas participantes reforzaron as súas habilidades en programación, robótica e ciencia traballando con ferramentas como a robótica con LEGO, Arduino, drons, Micro:Bit; Edison, Delightex ou mesmo co deseño e a impresión 3D.