Remata o campamento tecnolóxico de verán do Campus Industrial de Ferrol

A vicerreitora do Campus de Ferrol e Responsabilidade Social, Ana Ares, e o director do Campus Industrial da Universidade da Coruña (UDC), Marcos Míguez, posan cos participantes da segunda quenda do campamento tras a entrega de diplomas.

Máis de 70 nenos e nenas de entre 6 e 16 anos tomaron parte, entre o luns 23 e o venres 27 de xuño e do luns 30 ao venres 4 de xullo, no Campamento Tecnolóxico de Verán Misión Salvar a Terra, promovido por segundo ano consecutivo por Play Code Academy en colaboración co Campus Industrial da Universidade da Coruña (UDC).
Durante estas dúas semanas, a rapazada enfrontouse a distintos retos como programar drons para tarefas de reforestación, construír robots recicladores ou deseñar estacións meteorolóxicas intelixentes, ao tempo que adquirían competencias clave en programación, robótica e ciencia.