Remata o ciclo Girl STEAM 2025 cunha numerosa participación da rapazada

Daba comezo en xullo deste ano un novo ciclo de obradoiros de verán para incentivar as vocacións tecnolóxicas entre as nenas e nenos, estamos a falar do Girl STEAM 2025, unha proposta da que xa se deu conta en Código Cero e organizada polo Colexio Profesional de Enxeñaría Técnica en Informática de Galicia (CPETIG) e a Axencia para a Modernización Tecnolóxica de Galicia (AMTEGA). Este novo ciclo botaba a andar no mes de xullo nas aulas CeMIT de 14 concellos galegos. Cada lugar contou con dúas quendas por idade de 4 horas de duración, unha para escolares de 8-11 anos e outra para idades comprendidas entre os 12-15 anos, cun aforo máximo de 15 persoas por quenda. O peche final do Girl STEAM 2025 tiña lugar o venres, 5 de setembro en Guitiriz.
Nos obradoiros achegouse ao alumnado ao funcionamento das placas micro bit, que son tarxetas programables de aprendizaxe. Ensinouse a identificar as súas principais funcións e programar con diferentes comandos. Traballouse en grupo na construción e programación dun proxecto dos 20 modelos que achega o kit de robótica e construción co que contan as aulas CeMIT. Unha vez superada esta primeira fase, continuouse o traballo coa placa para a elaboración dun proxecto libre sobre estruturas realizadas con materiais reciclables, como botellas, cartóns, madeira ou tecidos.
Facendo balance desta iniciativa, foron case 300 rapazas e rapaces os protagonistas este verán dos obradoiros Girl STEAM 2025, cos que se foi á procura de impulsar actividades lúdico-formativas de inmersión tecnolóxica que acheguen ás rapazas desde idades temperás ás novas tendencias tecnolóxicas co fin de espertar o seu interese e reforzar a confianza nas súas capacidades para cursar estudos STEAM e apostar por profesións do eido TIC.