Remata o quinto Coworking de Barro co despegue definitivo de 20 proxectos innovadores
venres, 31 de xullo do 2020
A
quinta
edición do Coworking de Barro, impulsado pola Deputación de
Pontevedra en colaboración coa Escola de Organización Industrial
(EOI) baixo o lema Apostando por un futuro sustentábel
en 2030, chegou esta semana ao seu remate. E fíxoo cunha
xornada de demostración (un Demo Day) na que os proxectos
impulsados e acubillados luciron potencial de mercado e poder de
innovación: 20 iniciativas co nexo común de revolucionar o tecido
produtivo.
No
acto, conducido polo xornalista, Luis Fraga, e no que tamén
participaron o alcalde de Barro, Xosé Manuel Fernández e,
telematicamente, a directora xeral da EOI, Nieves Olivera, a
presidenta provincial, Carmela Silva, enxalzouse a capacidade de
resposta dos proxectos emprendedores, centrados na sustentabilidade,
nas novas tecnoloxías e nos principais sectores produtivos da
provincia.
En
total participaron na quinta edición da aceleradora de traballo
colaborativo de Barro 20 proxectos emprendedores, dos que 11 foron
liderados por mulleres.
A
presidenta da Deputación puxo en valor ao equipo de traballo do
coworking, liderado pola mentora Carmen Costas, cuxos
integrantes tiveron que adaptar a formación presencial, ideada nun
primeiro momento ao igual que nas anteriores edicións, para
reconvertela en telemática debido á COVID. Pola súa banda, o
alcalde de Barro, Xosé Manuel Fernández, enxalzou o importante
traballo levado a cabo polas emprendedoras e polo equipo de
asesoramento. Tamén salientou o papel da Deputación de Pontevedra e
da EOI, “axudándovos a afrontar as vosas ilusións e proxectos de
futuro a través da formación, con espazos, como este de Barro, para
que todas e todos teñades moitas máis oportunidades”.
Na
quinta edición do Coworking de Barro participaron proxectos
empresariais en fase temperá de desenvolvemento, co obxectivo de
aumentar as súas posibilidades de éxito a través dun programa de
asesoramento personalizado que incluíu formación grupal e titorías
individuais a distancia. Deste xeito na xornada presentáronse todas
as iniciativas participantes entre as que se atopan Terracans,
de Noelia Prieto, unha residencia canina para gozar de “vacacións
divertidas”; Galinsecta, de Manuel Ángel Gil e Héctor
Fernández, adicada á cría de insectos para a produción de
ingredientes orgánicos de alta calidade para alimentación animal;
Shell Panel, de Joaquín Domínguez, centrada no deseño e
fabricación de paneis para revestimentos de paredes feitos con
residuos da industria pesqueira; EspacioMas, de César
Caldera, que fabrica kits para a montaxe dun espazo adicional para o
lecer; HomeQube, de Juan Alfonsín, que presta servizos
domóticos para o fogar intelixente; Abella Procuradores, de
Dolores Abella, centrada na sustentabilidade; Datasight
Consulting, de Laureano Pérez, consultaría de negocio para
pemes orientada á transformación dixital; Meigas de Brigantia,
de Abel Augusto, centrada no desenvolvemento de xogos narrativos; Eva
Fandiño, de Eva Pena, que elabora ilustracións minimalistas;
Del+Granero Creativo, de Pilar Delmas, espazo de colaboración
dirixido a persoas artistas e creadoras; Recunchos, de
Verónica García, axencia de viaxes especializada en visitas e rutas
guiadas; Patri Menduiña Turismo+Patrimonio, de Patricia
Novas, centrada no asesoramento, acompañamento e deseño de produtos
turísticos; Turismo de Historias, de Silvia Cernadas, empresa
de rutas turísticas e actividades de formación baseadas na
investigación histórica; María Biembica Abogada, de María
Biempica, empresa que presta asesoramento xurídico para o sector
turístico; Galicia Legens, de Silvia Sancho, centrada nos
contidos visuais especializados na cultura etnográfica; Entrenar
desde 0, de Daniel Oliveira, unha aplicación de exercicio
físico, nutrición e hábitos saudábeis; Moliabo, de Ángel
Vidal, empresa dedicada ao adestramento deportivo especializado en
fútbol; Garden Yoga, de Bernardo Gamallo, escola virtual e
presencial de ioga e meditación tibetanos; Artesa Saudable,
de Sonia Iglesias, proxecto dedicado a impartir cursos e obradoiros
de alimentación saudábel e sustentábel e Maremonte, de
Sandra viñas, empresa de patés de cogomelos e setas das Rías
Baixas.