ResetPlug, o enchufe que reinicia o noso router cando falla a Wi-Fi

Cada vez temos máis dispositivos conectados nos nosos fogares, principalmente a través de Wi-Fi, pero os routers que atenden a tal demanda de conexións non son precisamente de alta gama ou para cargas elevadas, de aí que cada certo tempo é preciso apagar e volver a prender o dispositivo para que todos os trebellos conectados na casa podan recuperar a conexión á Rede, e pensando en tal problema puxeron á venda nos EE.UU. o ResetPlug, unha especie de programador de enchufes que, en vez de guiarse por horarios, conéctase á nosa rede Wi-Fi e, no caso de detectar problemas co acceso á Rede, corta o fluxo de corrente eléctrica uns segundos de xeito que, se conectamos en tal toma o noso router, este reiniciarase todas as veces que sexan preciso até que se recupere a conexión á Internet.
Esta solución pode resultar moi práctica para fogares nas que non teñen o router instalado nun lugar visible e accesible ou, simplemente, queren evitar a molestia de ter que ir dunha habitación a outra para reiniciar o router cada vez que falla a conexión á Internet.
Esta idea é bastante orixinal é está ben executada, aínda que o seu prezo non fai que o ResetPlug sexa moi atractivo, xa que véndese a 59,99 dólares, cantidade que só compensaría pagarse no caso de fallos moi frecuentes (nos que posiblemente sería máis recomendable mercar un router de maior capacidade por un prezo só un pouco superior).