Retirada a web fraudulenta sobre turismo de Redondela

O Goberno de Redondela informou da retirada da web fraudulenta sobre turismo do concello. O departamento de Novas Tecnoloxías revisara esta páxina, que, segundo fontes do Consistorio, contiña máis dun 80% de contidos erróneos ou falsos e “cunha imaxe moi semellante á da páxina oficial de Turismo do Concello de Redondela”.
As denuncias realizadas polo departamento municipal de Novas Tecnoloxías ante os organismos oficiais obtiveron o resultado desexado. O Concello agradeceu a retirada da web, que “viña provocando prexuízos a Redondela e á súa veciñanza, e sobre todo aos turistas e peregrinos que visitan a vila”, advertiu a alcaldesa, Digna Rivas. A web, que podería estar creada con IA, xa foi denunciada ante os organismos públicos para que sexa retirada.
Estaba operativa no sitio www.turismoredondela.es.
O Concello recoñeceu que tivo coñecemento da existencia desta web o pasado mes de xullo e o departamento de Novas Tecnoloxías revisou o seu contido de xeito exhaustivo. “Comprobamos que nunha porcentaxe superior ao 80% os contidos da web son erróneos ou falsos”, sinalaron dende o Concello, engadindo que na páxina “faise referencia a lugares que non se atopan no municipio de Redondela, como o templo de San Benito, o Sendeiro das Greas ou a praia de Loureiro”.
Engaden que a web contiña tamén fotografías “cuxas imaxes non se corresponden coa información á que fan referencia”. A páxina viña ofrecendo tamén información de establecementos de hostalaría que non existen neste municipio “e así a gran maioría dos recursos turísticos que ofrecía a páxina, que non se axustaba para nada á realidade”, sinalara a alcaldesa Digna Rivas.
Este verán o Concello comunicou este feito aos organismos públicos para a retirada da páxina de Internet, tanto ao CCN (Centro Criptográfico Nacional), como ao INCIBE (Instituto Nacional de Ciberseguridade), a AEPD (Axencia de Protección de Datos) e aos Servizo Ciberseguridade Acordo Marco ( Amtega – Xunta de Galicia)
Tamén se comunicou a Google esta situación dende o Concello de Redondela para dar conta desta situación, xa que esta páxina viña aparecendo como segunda opción neste buscador, por detrás da web oficial de turismo do Concello de Redondela.