Retómase a formación práctica en contidos audiovisuais da Deputación de Lugo
xoves, 8 de setembro do 2022
O
equipo directivo e docente do Centro
de Formación Audiovisual da Deputación de Lugo deu a benvida ao
alumnado de 1º e 2º curso dos ciclos superiores de Realización e
Produción que realizarán os seus estudos neste ano académico
2022-2023, o primeiro sen restricións nas aulas tras a pandemia.
Na recepción, este xoves 8 de setembro, púxose o foco nas novidades
deste curso e en como coa volta á normalidade postCOVID retómanse
as prácticas en escenarios reais, “unha das sinais de identidade
da Escola”, xunto á matrícula gratuíta e o ensino innovador que
promove a institución provincial, moi envorcada en formar ás
creadoras e creadores de contidos dixitais do novo e puxante
escenario audiovisual.
Os
actos de presentación desta primeira xornada formativa incluíron
visitas ás instalacións e desenvolvéronse ao longo de toda a mañá
en dúas quendas. A primeira arrancou ás 9.30 horas co alumnado de
novo ingreso de ambos ciclos, e a segunda quenda, que tivo lugar ás
12.30 horas, estivo dirixida aos alumnos que xa iniciaron os seus
estudos o pasado curso.
Cubertas
as prazas no ciclo de Realización
A
Escola de Imaxe e Son da Deputación inicia o novo curso coa
totalidade de prazas cubertas para o ciclo superior de Realización
de Audiovisuais, Radio e Espectáculos. Un total de 20 novos mozos e
mozas iniciaranse nesta especialidade tras formalizar a súa
matrícula no centro da institución provincial.
O
período de inscrición mantense aberto, ata principios do vindeiro
mes de outubro, na rama de Produción de Audiovisuais, Radio e
Espectáculos, con vacantes aínda dispoñíbeis. As persoas que
estean interesadas poden acceder a toda a información sobre este
ciclo na
ligazón da web provincial ou ben chamando ao teléfono do centro
982.28.46.67.
Volven as prácticas
Unha
das novidades do inicio deste curso académico no Centro de Formación
Audiovisual da Deputación é a recuperación das prácticas en
escenarios reais, que se viron paradas a causa da crise sanitaria.
Isto, explicaron dende a Deputación, “permitirá aos estudantes
poñer en práctica os coñecementos teóricos adquiridos nas aulas
en coberturas reais como retransmisións en directo, a organización
de eventos ou incluso formando parte dun equipo de rodaxe ao lado dos
mellores profesionais en grandes producións coas que colabora o
organismo provincial, como por exemplo o último éxito nacional do
director monfortino Dani de la Torre co film Live is Life”.