Roblox chegará a consolas PlayStation

O fenómeno de Roblox non para de medrar, e tras anunciarse en xullo que estaba a preparar a súa chegada a dispositivos Meta Quest, agora engaden durante a Roblox Developers Conference que Roblox tamén terá versión para consolas PlayStation 4 e 5 a partir do mes que vén.
Dado que Roblox xa leva moito tempo presente en Xbox One e Xbox Series X|S, podemos entender que a súa adaptación a consolas PlayStation pode realizarse sen esforzo e sen ter concesións, polo que as experiencias nas consolas de Sony sería completas (mentres que nos dispositivos de realidade virtual espérase que teñan algunhas limitacións provocadas polo cambio de interface).
Temos así que esta plataforma que tanto éxito ten entre a rapazada só estaría pendente de chegar a unha plataforma importante, a Nintendo Switch, aínda que resulta difícil adiviñar se realizarán tal lanzamento nos vindeiros meses ou preferirán agardar á renovación da consola de Nintendo (prevista para o ano que vén).