Roborock presenta un robot aspirador capaz de superar chanzos

O fabricante de robots aspiradores Roborock presentou no CES de Las Vegas a súa nova xeración de dispositivos de limpeza intelixente, encabezada polo que a compañía define como o primeiro robot aspirador do mundo capaz de combinar rodas e patas para desprazarse por escaleiras e superficies complexas.
A principal novidade foi o Saros Rover, un robot aspirador cunha arquitectura híbrida de rodas e patas que lle permite subir escaleiras, superar pendentes e adaptarse a distintos tipos de terreo mantendo o corpo nivelado.
Cada módulo roda-pata pode moverse de maneira independente, realizar xiros rápidos, pequenos saltos e cambios de dirección mentres limpa, apoiándose en algoritmos avanzados de intelixencia artificial e nun sistema de percepción espacial en tres dimensións. Este enfoque está especialmente orientado a vivendas de varios andares, onde o dispositivo pode limpar cada chanzo e reducir de forma significativa as zonas inaccesibles.
Xunto ao Saros Rover, Roborock deu a coñecer novos modelos da súa gama de aspiradores domésticos que chegarán ao mercado durante a primeira metade de 2026. Entre eles figuran os Saros 20 e Saros 20 Sonic, evolución da serie insignia lanzada en 2025. O Saros 20 incorpora unha versión mellorada do sistema autónomo StarSight 2.0, capaz de recoñecer ata 201 obxectos, así como un chasis AdaptiLift 3.0 que permite superar soleiras simples de ata 4,5 centímetros ou dobres de 4,5 máis 4 centímetros. Pola súa banda, o Saros 20 Sonic aposta por un corpo ultradelgado de 7,98 centímetros grazas ao sistema de navegación RetractSense e por un novo fregado VibraRise 5.0 cunha mopa sónica extensible que realiza 4.000 movementos por minuto. Ambos modelos empregan un motor HyperForce de 35.000 pascais e complétanse cunha base RockDock con lavado con auga quente a 100 graos.
A gama complétase co Qrevo Curv 2 Flow, o primeiro robot aspirador da marca equipado con roletes. Este modelo introduce a tecnoloxía SpiraFlow de autolimpieza en tempo real, unha presión descendente de fregado de 15 newtons e un sistema Edge-Adaptive que estende o rolete para limpar arredor dos bordes, co obxectivo de mellorar a precisión sen comprometer a protección das alfombras.
No ámbito exterior, Roborock confirmou tamén a súa entrada no mercado norteamericano de robots cortacéspede, cunha nova familia encabezada polo RockMow X1 LiDAR. Este modelo combina detección ambiental LiDAR Sentisphere, tracción ás catro rodas, dirección activa patentada e suspensión dinámica para facilitar unha instalación sinxela e un corte preciso, especialmente nos bordes. A oferta inclúe ademais o RockMow X1, con navegación RTK e VSLAM de precisión centimétrica, e o RockNeo Q1, unha opción máis básica pensada para xardíns pequenos e medianos.