Rockstar Games estrea lanzador de xogos para PC

As grandes compañías de videoxogos para PC tenden a crear cadansúa tenda en liña en forma de aplicación de escritorio dende a que poder mercar xogos, instalalos e xestionar as súas actualizacións, e o último estudio en dar tal paso é Rockstar Games, que vén de estrear un lanzador de aplicacións para Windows que permite xestionar os seus xogos (incluso aínda que se adquirisen noutras tendas dixitais), incorporando gardado de partidas na nube, actualizacións automáticas e, como grande reclamo, por tempo limitado facilita a adquisición de balde do clásico Grand Theft Auto: San Andreas.
Polo momento a tenda dixital no Rockstar Games Launcher limítase a ofrecer Grand Theft Auto V, Grand Theft Auto: Vice City, L.A. Noire, Max Payne 3, Grand Theft Auto III, Bully e o mencionado Grand Theft Auto: San Andreas, pero tamén serve para adquirir cartos virtuais para Grand Theft Auto Online e para canxear códigos de compra, polo que é unha plataforma prometedora, xa que facilita que sexa a propia Rockstar a que teña o control sobre a comercialización dixital dos seus produtos, o que pode supor prezos puntuais máis axustados, pola eliminación de intermediarios.