SEGA anuncia un recompilatorio de xogos de Dreamcast para Xbox 360 e PC

Tras moitos meses con rumores sobre a chegada de múltiples xogos clásicos da consola SEGA Dreamcast á Xbox 360 de Microsoft, finalmente SEGA anuncia que vai lanzar Dreamcast Collection, un paquete que o vindeiro 25 de febreiro chegará ás tendas en formato físico tanto para Xbox 360 como para PC (aínda que tamén agárdase unha comercialización como descarga máis adiante) e que recollerá 4 xogos moi representativos da consola de SEGA que precedera á PlayStation 2 e que está considerada por moitos como a mellor videoconsola en relación ao seu tempo.
Os xogos da Dreamcast Collection serán Crazy Taxi, título con múltiples conversións e secuelas que ilustran o seu éxito e que aínda pode verse nos poucos salóns recreativos que quedan na actualidade; SEGA Bass Fishing, o xogo de pesca que sorprendeu a moitos e que podemos entender como precursor do mando da Wii; Sonic Adventure, un dos títulos clásicos da mascota de SEGA que parece estar a vivir unha boa racha nos últimos meses (grazas a Sonic 4 e Sonic Colours) e Space Channel 5: Part 2, un xogo de baile protagonizado pola reporteira intergaláctica Ulala e que marcou unha época.
En vista da ausencia de títulos como as dúas primeiras entregas de Shenmue, o excelente Jet Set Radio, o recentemente recuperado cunha versión para iOS ChuChu Rocket ou Virtua Fighter 2, parece probable que de ter éxito, esta compilación podería contar con novas entregas.