SIC17 Summer xunta en Vigo os máis referenciais expertos en europeos en procesado de sinal
martes, 4 de xullo do 2017
O Centro Social
AFundación en Vigo está a acoller hoxe un encontro de traballo
internacional sobre todo o que quixemos saber da teoría da
información, o procesado de sinal, as redes de comunicación de
sensores e o deseño de algoritmos que axuden aos sistemas
informáticos e ás máquinas a subir novos chanzos en intelixencia,
eficacia e puntería. Trátase da sexta edición da xuntanza Spanish
Workshop on Signal Processing, Information Theory and Communications
(SIC17 Summer), na que están
a participar tres ducias de docentes e investigadores do procesado de
sinal e as comunicacións avanzadas. A xeira de traballo vén da
man do Grupo de Procesado de Sinal en Comunicacións da Universidade
de Vigo, co apoio da Universidade Politécnica de Cataluña,
coordinadora da RedComonsens. Esta rede de excelencia ten a súa
orixe no proxecto Comonsens, que se desenvolveu entre os anos 2009 e
2014 e no que participaron 135 investigadores de dez grupos españois,
entre eles o GPSC da Universidade de Vigo.
Segundo explica Roberto
López, integrante do dito grupo GPSC e coordinador do workshop,
a sesión ten carácter bianual e nela participan docentes e
estudantes, así como calquera investigadora ou investigador
interesado na temática.
En total, estanse a
presentar nesta edición da xuntanza 16 pósters. A xeira de traballo
conta neste senso coa participación de tres relatores convidados.
Primeiro, o catedrático da Universidade de Aveiro e profesor adxunto
en Carnegie Mellon University Rui Aguiar, en palabras da organización
do evento “un recoñecido experto internacional no eido das
tecnoloxías de rede. Segundo, Daniel Romero, profesor titular na
Universidade de Agder (Noruega), “que centra a súa investigación
en métodos de aprendizaxe máquina aplicados a comunicacións sen
fíos”. E teceiro, Antonio G. Marquéz, profesor titular na
Universidade Rei Juan Carlos, experto na optimización de redes de
comunicacións sen fíos e de distribución eléctrica e aplicación
do procesado de sinal á teoría de redes.
Logo de cinco edicións,
Roberto López, docente e investigador do Grupo de Procesado de Sinal
en Comunicación considera que “estas reunións periódicas
demostraron ser un instrumento moi valioso para reforzar as relacións
entre investigadores españois do eido do procesado de sinal e as
comunicacións, dando lugar a numerosos resultados de investigación
realizados en colaboración entre eles, así como a captación de
fondos mediante proxectos realizados de xeito coordinado”.