SIVSA transformou xa máis de 150 procedementos empresariais dende o seu Centro de Automatización

A empresa tecnolóxica SIVSA, referente galego en novas tecnoloxías, fixo este mes de xullo un balance da actividade xerada dende o seu Centro de Excelencia de Automatización, un servizo dende o que se transformaron cara a meirandes eficiencia e a simplifación máis de 150 procedementos en clientes dun amplo abano de sectores (saúde, banca, seguros, comercio retallista, telecomunicacións ou motor).
“O balance é moi positivo”, sinala a empresa viguesa, que salienta que logrou un aforro medio de entre o 40 e o 60 por cento en tarefas tan diversas como a creación de historiais médicos, a análise de solicitudes de préstamos, a tramitación de sinistros, a xestión de envíos loxísticos ou a provisión de liñas para portabilidades. “En todas as empresas e sectores, sen excepción, existen procesos que poden optimizarse con solucións de automatización”, explicaron dende SIVSA, engadindo que “nun escenario altamente competitivo como o actual, a incorporación de tecnoloxías de automatización de procesos converteuse nunha ferramenta con grandes beneficios a curto prazo, tanto para as grandes corporacións como para as pequenas empresas”. Isto é así porque estas ferramentas permitan aumentar o control e a calidade dos procesos, reducir os custos operativos ou ofrecer unha maior centralización e estruturación da información, amais de potenciar a produtividade e minimizar os erros.
O Centro de Excelencia de Automatización de Procesos de SIVSA está integrado por un equipo de vinte profesionais expertos nas tecnoloxías máis avanzadas (UiPath e Power Automate). Os partners tecnolóxicos son líderes no mercado de solucións de RPA, BPM ou IA, “o que nos permite deseñar e implantar solucións sustentábeis e a medida para os nosos clientes, que poden ser ademais evolucionadas no tempo, conforme a novas necesidades”, engaden fontes da empresa galega.