Samsung Galaxy J5, un novo smartphone con flash para selfies

martes, 21 de xullo do 2015 Marcus Fernández

A aposta polos selfies dende o móbil parece imparable, a tras a carreira por incrementar a resolución das cámaras frontais, chega agora a teima por integrarlles un flash de seu optimizado para ser suave e así achegar a luz necesaria para que poidamos retratarnos en interiores sen grande problema. Iso levou a Samsung a lanzar estes días en Corea do Sur o seu novo Galaxy J5, un terminal con pantalla Super AMOLED de 5 polgadas, procesador de catro núcleos a 1,2 GHz, 1,5 GB de RAM, 16 GB de almacenamento interno e batería de 2.600 mAh que destaca pola súa cámara frontal de 5Mpíxeles con grande angular (de 120 graos) e flash LED. A cámara traseira, loxicamente tamén con flash, conta pola súa banda cunha resolución de 13 Mpíxeles (cunha apertura f/1.9).
Este novo terminal sae á venda por 297.000 wons (236,90 euros) aínda que non podemos esperar que saia directamente fóra do mercado xaponés, senón que tería que facelo nunha variante internacional, xa que este terminal está adaptado para recibir o sinal da TDT móbil que teñen en Corea.
Con este tipo de smartphone Samsung pretende achegarse a usuarios de a pé, que non buscan dispositivos de alta gama, pero si queren tomar boas fotografías e poder gozar dun dispositivo versátil.

PUBLICIDADE