Samsung anuncia dos smartphones económicos con Android 4.1

Aínda que normalmente os móbiles de Samsung que ocupan lugar nos titulares son os GALAXY S e Note, o fabricante surcoreano non só ten unha forte liña de gama alta, senón que tamén coida os terminais de entrada, estreando agora os GALAXY Fame e Young, que chegan con Android 4.1 e unhas prestacións axustadas para conter enormemente o seu prezo (pois parecen chamados a ocupar o lugar dos GALAXY mini, Ace e Y). Ambos móbiles veñen cun procesador a 1 GHz, 4 Gb de almacenamento interno, batería de 1.300 mAh e Wi-Fi Direct, e nalgúns mercados van estar dispoñibles en versión con dobre SIM.
O GALAXY Fame estará dispoñible en branco perla e azul metálico, ten unha pantalla de 3,5 polgadas cunha resolución de 320 x 480 píxeles, 512 Mb de RAM e cámaras de 5 e 0,3 Mpíxeles, Bluetooth 4.0, terá versión con NFC e o seu grosor será de 11,6 milímetros e o seu peso de 120,6 gramos, mentres que o GALAXY Young opta por unha pantalla de 3,27 polgadas cunha resolución de 320 x 480 píxeles, 768 Mb de RAM, cámara traseira de 3 Mpíxeles, Bluetooth 3.0, un grosor de 12,5 milímetros e un peso de 112 gramos.