Samsung anuncia tablets GALAXY Tab 3 con pantallas de 8 e 10,1 polgadas

O novo tablet de 8 polgadas está pensado para o seu uso en mobilidade

Samsung continúa a ampliar a súa familia de tablets, e esta semana presenta os novos GALAXY Tab 3, do que xa había un modelo de 7 polgadas anunciado ao que agora súmanse dispositivos con pantallas de 8 e 10,1 polgadas, que estarán dispoñibles este mesmo mes a escala global.
O Samsung GALAXY Tab 3 de 8 polgadas (cunha resolución de 1.280 x 800 píxeles) chega cun procesador de dobre núcleo a 1,5 GHz, 1,5 Gb de RAM, 16/32 Gb de almacenamento interno (ampliable mediante tarxetas microSD de ata 64 Gb), Wi-Fi N, Bluetooth 4.0, USB 2.0, 3G/LTE (opcional), GPS, cámaras de 5 e 1,3 Mpíxeles, batería de 4.450 mAh e sistema operativo Android 4.2 completado con numerosas aplicacións de Samsung. Sería ideal para usuarios que queiran acadar o equilibrio entre mobilidade e un bo tamaño de pantalla, presentando un grosor de só 7,4 milímetros e un peso de 314 gramos.
O Samsung GALAXY Tab 3 con pantalla de 10,1 polgadas (cunha resolución de 1.280 x 800 píxeles) funciona cun procesador de dobre núcleo a 1,6 GHz, 1 Gb de RAM, 16/32 Gb de almacenamento interno (ampliable mediante tarxetas microSD de ata 64 Gb), Wi-Fi N, Bluetooth 4.0, USB 2.0, 3G/LTE (opcional), GPS, cámaras de 3 e 1,3 Mpíxeles, batería de 6.800 mAh, 7,95 milímetros de grosor, 510 gramos de peso e Android 4.2, que busca un uso máis doméstico, de aí que conte con opcións como saída de televisión (MHL).