Samsung estrea unha aplicación móbil para monitorizar o noso estado físico

Durante a presentación do Samsung Galaxy S III o fabricante surcoreano insistía en que o novo terminal estaba “deseñado para os humanos” e avanzando nesta liña anuncian hoxe a dispoñibilidade de S Health, unha aplicación persoal para o coidado persoal que recolle información sobre a saúde do individuo para facerlle doado levar unha vida saudable. Esta aplicación móbil é compatible cunha serie de sensores como o medidor de glicosa en sangue de Livescan, os monitores de presión arterial de OMRON (HEM-7081-IT) e A&D (UA-767-PBT-C) e a báscula con medición de composición corporal de OMRON HBF-206-IT, permitindo transferir os datos rexistrados nestes dispositivos ao móbil dun xeito automático.
S Health recolle a información rexistrada e crea gráficos e táboas para facer doada de entender a información recollida, facilitando un seguimento do noso estado físico para poder programar a nosa dieta, exercicio ou medicación. Para os que gocen deste tipo de tecnoloxías para marcarse retos persoais, tamén é posible integrar S Health con redes sociais, de xeito que a aplicación pode enviar actualizacións á Rede a través de Twitter.