Samsung presenta novos móbiles con grande batería e cámara de 50 Mpíxeles

Samsung presentou hoxe os seus novos smartphones Galaxy A13, M33 5G e M23 5G, que fan máis accesibles as novas funcionalidades dos teléfonos de Samsung aos consumidores, introducíndoas en dispositivos con prezos axustados.
Os dous novos móbiles da Serie M destacan por contar con pantallas de 6,6 polgadas con taxas de refresco de 120 Hz, o que agradecerán especialmente os amantes dos videoxogos, así como de conectividade 5G; o Galaxy A13 conta pola súa banda cunha pantalla Infinity-V de 6,5 polgadas e un refresco de 90 Hz.
No que a batería se refire, que é un dos puntos fortes da Serie M, o M33 5G ten unha capacidade de 6.000 mAh, e o M23 5G ten unha capacidade de 5.000 mAh, ambas con carga rápida de 25 watts, mentres que a velocidade de carga do A13 limítase a 15 watts.
Estes novos móbiles tamén gozan de cámaras bastante destacables: os tres teñen cámara frontal de 8 Mpíxeles, mentres que na cámara traseira o M23 5G ten unha cámara tripla cun sensor principal de 50 Mpíxeles e o M33 5G e o A13 teñen cámara traseira cuádrupla cun sensor principal de 50 Mpíxeles (diferenciándose pola incorporación dun sensor para fotografías macro de 2 Mpíxeles).