Samsung presenta o seu smartwatch

mércores, 4 de setembro do 2013 Marcus Fernández

JK Shin abriu o evento amosando o novo Samsung GALAXY Note 3

Samsung fixo o seu segundo Unpacked do ano, nun evento en Berlín sen sorpresas, no que amosou tanto o seu agardado GALAXY Note 3 como o seu rumoreado smartwatch, completando a xornada cunha revisión do seu tablet con pantalla de 10,1 polgadas, e apostando en todos os casos non só por un hardware potente, senón tamén por un software que permítelles diferenciarse dos seus competidores.
O Samsung GALAXY Note 3 sairá á venda o 25 de setembro, e supón un incremento de tamaño da familia de tabletófonos de Samsung, presentando unha pantalla Super AMOLED de alta definición (1.920 x 1.080 píxeles) cunha diagonal de 5,7 polgadas, mantendo o terminal nun grosor de só 8,3 milímetros e cun peso de 168 gramos. Entre a súas especificacións tamén destaca que funciona con Android 4.3; integra cámaras de 13 e 2 Mpíxeles, Wi-Fi AC, GPS, NFC, Bluetooth 4.0, infravermellos, MHL 2.0, unha xenerosa batería de 3.200 mAh, 32 ou 64 Gb de almacenamento interno (ampliable mediante tarxetas microSD de ata 64 Gb) e unha impresionante cantidade de memoria RAM (3 Gb) claramente orientada a permitir que o smartphone poida realizar varias tarefas ao mesmo tempo, aproveitando o grande tamaño da súa pantalla.

Con Pen Window podemos abrir unha segunda aplicación no recadro que indiquemos en pantalla

Este móbil destaca pola súa excelente integración do S Pen, que vén acompañado por numerosas aplicacións de Samsung, como Action Memo (que permite tomar notas a man que poden recoñecerse para realizar unha chamada de xeito instantáneo ou engadir contactos á axenda), Scrapbook (un libro de recortes no que almacenar contidos de distinto tipo que atopemos na Rede), Screen Write (captura a pantalla actual para poder tomar anotacións sobre a mesma), S Finder (un potente buscador dos contidos almacenados no móbil) e Pen Window (que non só permite usar o S Pen para escribir en pantalla, senón incluso para definir recadros nos que amosar unha aplicación secundaria para, por exemplo, abrir unha calculadora sen deixar a aplicación actual). A pantalla do dispositivo tamén pode dividirse en varias fiestras con distintas aplicacións, sendo incluso posible arrastrar e soltar contido entre ambos espazos.
Pero se algo quería ver o público do evento desta tarde era o smartwatch de Samsung, que podería ser o primeiro dispositivo deste tipo en chegar a un público masivo (aínda que temos que lembrar que xa hai anos que existen no mercado, incluso con fabricantes tan importantes como Sony). O Samsung GALAXY Gear busca ser un bo complemento para os smartphones Samsung GALAXY, que lévase no pulso coma un reloxo normal, pero que achega notificacións do móbil, integra un altofalante para poder responder chamadas directamente dende o reloxo (aínda que dun xeito bastante incómodo), permite dar ordes por voz ao smartphone (programando alarmas, engadindo entradas no calendario ou consultando a predición do tempo), captura a nosa actividade diaria (dispara fotografías de 1,9 Mpíxeles e serve para tomar notas rápidas de voz), pode operar como podómetro (funcionalidade que parecen estar a por de moda distintas pulseiras conectadas que se comercializaron nos últimos meses) e incluso pode axudar a localizar o smartphone forzándoo a soar, iluminarse e vibrar.

O reloxo estrearase con correas de 6 cores diferentes

O GALAXY Gear venderase en varias cores diferentes a partir do 25 de setembro, e terá ducias de aplicacións optimizadas para o dispositivo que funciona cunha pantalla Super AMOLED de 1,63 polgadas cunha resolución de 320 x 320 píxeles, Bluetooth 4.0, 512 Mb de RAM, 4 Gb de memoria interna, acelerómetro, xiroscopio e batería de 315 mAh que achegaría unha autonomía de máis de 25 horas de uso. O seu grosor é de 11,1 milímetros e pesa 73,8 gramos. Espérase que o seu prezo de venda sexa de 299 dólares.
Máis discreto foi o novo Samsung GALAXY Note 10.1 (2014 Edition), que non deixa de ser unha actualización de especificacións de tablets anteriores, e que ten prevista a súa chegada ao mercado dende antes de rematar o mes. O novo tablet chegará con Android 4.3, unha pantalla Super clear LCD de 10,1 polgadas cunha resolución de 2.560 x 1.600 píxeles, cámaras de 8 e 2 Mpíxeles, Wi-Fi AC, Bluetooth 4.0, USB 2.0, GPS, 3 Gb de RAM, 16/32/64 Gb de almacenamento interno (ampliable mediante tarxeta microSD de ata 64 Gb) e S Pen. A súa batería é de 8.220 mAh, o seu grosor é de só 7,9 milímetros e o seu peso de 535 gramos (o modelo con Wi-Fi, pois tamén estará dispoñible en versións con 3G ou 4G).


Vídeo de presentación do Samsung GALAXY Note 3

PUBLICIDADE